今日年初一，恭喜發財，根據農曆節氣，未到二月四日立春，仍然係辛卯兔年，故此以算命計，二月四日立春之前出生之嬰兒，仍然係屬兔，未係龍仔龍女。
年初一係破日，做大事不宜，最好一家人在家團聚、和和氣氣、打麻將都唔好打到破口大駡上家誅牌，對家扣牌，下家偷雞，總之就係和氣生財，凡有不如意事，爭拗事，退一步，諗一諗，諗清楚就沒有大不了，好多事情都係可以坐低傾吓、傾吓，各讓一步，傾出一啲雙方可以接受嘅解決方案。個人私事係咁，社會眾人事更要和衷共濟，態度僵硬無補於事，搞到最後要法庭相見嘅話，何必呢？之但係，有啲能人能吏自命精英，總以為真理在我，我精你呆，我做事係為你好、為社會好，我有道理你要聽，你有苦衷只不過係搵錢藉口，不足為據，咁就麻煩咯，呢類態度會將無事變有事，小事變大事，弄得好多人身心不安寧，這等人物最好提早退休，到加勒比海、地中海遊船河，學吓休閑，嘆吓世界。
公關大姐大話年初一係破日，佢唔打電話嚟拜年嘞，放完假至講。佢就識得嘆世界嘞，過年前不久先至去過柬埔寨，領略吓法國前殖民地風情。法國人一星期工作三十五小時，大把時間去搞浪漫，加上成個八月份都係假期，做法國人係幾爽嘅，那理得美帝國主義，西部牛仔，粗魯干預法國內政，將法國國債主權評級由AAA調低至AA+吖。
放假前碰到幾位醫學教授，佢地啲學生在公立醫院做到極度疲勞，問佢地需唔需要降低工時，學吓法國救吓啲年青醫生？教授Ｃ話：「工時不是最主要問題，醫生每周工作六十五小時，可以應付嘅，主要係人手不足，一個醫生要同一時間應付幾個病人，緊張過我地以前每周工作一百小時！」人手不足就要長期增加醫學院學額，中短期向外求援，學習新加坡聘用海外醫生啦！教授Ｃ聽咗，笑而不語，睇來並不反對，如果一啲私家醫生有佢咁嘅態度，香港人可以達成共識，輸入海外醫生嘅話，大家和氣生財，健康就是財富，豈不更好！