熊黛林（Lynn）今年會與從南京來港的家人共度新歲，問到一家會否與城城「團年」，她即表示朋友梗會食飯。Lynn未急於結婚，笑言待未婚的兄長兩年後結了婚，自己再等多兩年才考慮。
熊黛林今年一家會在香港過龍年，她的父親、母親和兄長日前已由南京到港慶團圓，她說：「今年南京太凍，成零下10度，所以屋企人都嚟香港過年，會帶佢哋行吓花市，食好嘢。」對於新年願望，Lynn說：「希望屋企人同我都身體健康，今年多小病痛，要調理多啲身體。」
想情侶檔拍戲
Lynn又希望龍年可以在電影多點發展，她說：「好似喺《八星抱喜》做一個失明女仔嘅角色，再想試多啲唔同嘅角色，好想拍恐怖片，同埋希望拍到啲亞洲幕後組合嘅電影，好想同大導演合作，知仲有好大距離，需要磨練演技。」問她會否渴望與男友郭富城合作，她不諱言：「有機會梗好。」
城城今年也在香港過年，問Lynn會否相約城城與家人一齊吃團年飯？她即笑笑口道：「唔使，佢有自己屋企，會食飯，唔使咁認真，朋友食飯梗會。」Lynn已達適婚之齡，家人有否催婚？她說：「南京啲女仔大多數25歲就結咗婚，我哥都未結婚，佢頂多兩年先。」
「都會生BB」
記者笑現年31歲的Lynn即是兩年後嫁城城，她說：「兩年後阿哥結咗婚，我再等多兩年，要諗清楚，自己都會生BB，不過都計劃做多幾年嘢，因為始終唔係一個人嘅事，一個家庭至少係兩個人嘅事。」記者笑言今年想不想成為郭太，Lynn即笑言：「聽到『郭太』我會驚，一年一次大願望不會強求。」
採訪：梁錦雯 攝影：林德雄
