恭喜發財！今日是大年初一，視帝鄭嘉穎和視后胡杏兒先跟讀者拜年。去年是兩人豐收的一年，尤其是杏兒，事業愛情兩得意，公開與黃宗澤（Bosco）的戀情後，更可專注事業。嘉穎感情雖未有着落，但人仔賺到一篋篋帶返香港，老婆本早已準備妥當，只等女主人出現。撰文：羅美倫
杏兒派人仔利是
胡杏兒感恩過去一年遇到很多好劇本、好對手，她希望一路keep住好運，刻下她已返內地拍劇賺人仔，預計今年內地、香港兩邊走，雖然在港日子會減少，但幸有無綫劇《怒火街頭II》及《耀舞長安》兩部存貨，所以曝光率不會減少，她跟無綫已有共識多拍內地劇，不過她仍期待5月拍《衝上雲霄II》，因此劇是一部經典，她也希望再有代表作。
問到下個目標是甚麼？杏兒說：「Keep住家先啦，啱啱攞獎，想享受吓呢個時刻，唔想咁快定下一個目標，多謝投我票嘅人，我唔會驕傲，會繼續努力。」
「拍吓拖先」
自從頒獎禮上公開與Bosco的戀情，杏兒隨即返內地拍劇，豈非可避過被人催婚派利是？杏兒大叫：「哎呀，我近呢幾年未婚都有派利是啦。呢幾年都冇乜拍過拖，拍吓拖先，所以唔好再催。」事實上杏兒感激公司不斷給機會，所以她想先專心做好工作，她又透露今年會派人仔利是，是一點心意，希望同事開開心心。
談到嘉穎與Bosco，哪個才是她的最佳拍檔呢？杏兒說：「我同Bosco合作過一套咋，好耐冇合作喎，同嘉穎就好有火花。」杏兒讚嘉穎是好男人，可惜他至今名草未有主，杏兒笑說：「佢要求好高，要靚女、聰明又要溝通到，祝佢快啲搵到個啦！」
嘉穎覓愛：要聰明
鄭嘉穎去年憑《步步驚心》在內地爆紅，又憑《怒火街頭》攞埋無綫和亞洲視帝，原來他還有一個遺憾，嘉穎說：「我唱歌出身，都未有代表作品，出碟係我嘅心願，希望今年做到啦。」
「靚就最好」
嘉穎手上工作已排到明年10、11月，事業得意但感情猶空，他可有羨慕杏兒公開戀情？嘉穎笑說：「幾好呀！我家最緊要搵到個啱至可以約會拍拖，我都ready好，不過未遇到個啱啫。」
是否如杏兒所言要求高呀？嘉穎說：「係要聰明要溝通到，我冇話要靚呀，不過靚就最好啦，最緊要聰明，有靈魂，有呢啲條件嘅都名花有主啦，咪儲吓老婆本先囉，結婚唔係人結我結，唔能夠求其。」嘉穎認為要白頭到老，另一半必須做到朋友，因為幾轟烈的愛情都會淡，他笑言已大個仔，大家毋須為他擔心。
場地：K11DesignStore
化妝：CyrusofBeautyTeah
服裝：中藝
髮型：BillyofHairCulture