今年不知是否因為政府派咗六千蚊，市面零售非常暢旺，新年前買花，真係手快有，手慢冇。大編輯每年買花送俾家中親戚，過年前因事忙，例如台灣雙英競選，香港雙英競選等新聞，令佢睇稿睇到頭暈，抽唔到時間去花墟，就幾乎買唔到花。好彩上星期卒之偷得浮生半日閒，去到花墟，相熟檔主話：「哎吔，好多蘭花都賣晒咯，我見到你咁遲都唔嚟，留住三四盆畀你，怕都冇乜好揀，你要唔要呀？」事頭婆一拎花盆出嚟，人客一擁而上，個個話要，大編輯見狀，立即話：「係我訂咗嘅！」連忙磅水找數，請事頭婆搵位工友幫忙拎出街外，點知位花檔女工話：「咁重，我拎唔起呀！」事頭出嚟對大編輯猛講「鎖你」，順便訴苦：「?，依家好難請到工人，三十幾蚊一小時另加OT，完全冇新人應徵，現在呢三位女工，都係新移民，一位話啲花盆重，唔肯抬，另一位話淋花會濕手濕身，竟然唔肯灑水淋花，我做呢行幾十年，都未見過咁惜身怕辛苦嘅工人，冇晒符！」
可唔可以出五十蚊一小時去請工人呀？可以嘅。市道旺，冇所謂，但呢筆人工一定轉嫁落消費者度，消費者又會投訴物價高漲嘅啫。李純恩喺過年前在專欄話香港搵到一位共產黨，就係李卓人，笑到左丁山碌地，李卓人在政治上處處與共產黨對着幹（如平反六四），共產黨對佢處處提防，但在經濟政策上，李卓人仲左過共產黨，佢見到嘅工人苦況與小老闆李純恩見嘅工人難搵情況，完全唔同。李卓人嘅工黨與工聯會全力阻止輸入外勞，但建造業界就打鑼都搵唔到足夠工人開工，年青人又唔肯入行，影響所及，建築費有乜辦法唔貴，最俾唔起錢嘅就係大學，大學為咗應付三三四之來臨，2012年多收一倍新生，三四年來已搏命趕建教學設施，實驗室及學生宿舍，無不為高昂建築費而叫苦。不過習俗係在年初二開年，開年之日，無謂呻得太多，昨日初一係破日，諸事不宜，今日係危日好日，宜祭祀，出行，開市，掃舍，栽種等。吉時係上午九至十一時，下午三至五時，祝大家新年行好運。