大年初一，梗係要同大家講聲恭喜發財先！正所謂一年之計在於春，你今日做嘅任何嘢都可能影響到你全年運程！想過一個旺爆龍年，財源滾滾來？陳譽之師傅就教你各項新春升運必殺技，財神喺咩方位、咩時候迎接就最好，跟住做包你旺足全年！
記者：韓繼聰
攝影：劉永發
Model：Ceci、Benson@InterplayWorkshop
陳譽之師傅簡介
香港著名的泰國法科女師傅，自幼學道學法，師承眾多佛教名宿及道術泰斗，是東南亞極少數精通佛、道兩家精粹，而又善於風水命理及靈異神通的大師。
接財神要專心
卯時午時屬吉時
雖然年廿九晚行年宵可能行到好夜，但大年初一都要早啲起身。「今年嘅財神喺正南方，卯時出門（5am-7am），向正南方百步開外就可以迎財神。」除咗早起，接財神時亦要注意，路上要專心，千祈唔好分心同人講嘢，返屋企時亦千祈唔好回頭望，如果唔係接咗嘅財神都會溜走！晏咗起身錯過卯時又點算？唔使怕，午時都係吉時（11am-1pm），最啱出去行個大運，可以向南方財神位又或者東南喜神位行，同樣可增添財運。
龍年屬水宜黑綠 營多撈得起
新正頭，執番個新年Look，個個着到「紅噹噹」。不過，陳師傅話今年屬「水年」，而紅色正正屬火，跟水完全相剋，正所謂「水火不容」，你話着紅色又點會有好結果。咁咩色老利？師傅話金、綠、黑都係旺水嘅顏色，而同色系嘅灰、藍、銀、白等亦都係唔錯嘅選擇。另外唔少人初一都會食齋，不過食嘅時候記得多啲「撈」吓佢，取其「撈起」之意。而陳師傅亦建議快、靚、正嘅「撈起」食品，就係營多印尼撈麪，易煮易食之餘，亦夠晒「撈」味，龍年自然撈到風生水起。
新年MustNOT
雖然做齊以上各項可謂百無禁忌，不過仲有一啲嘢係千萬唔好喺大年初一做，就係洗頭同鬧交。洗頭會洗走晒啲運氣，當然唔得；而鬧交就會嚇走晒請返嚟嘅神同運，就算你晨早起身接財神，財神一樣同你SayByeBye！
認清方位 擺泰國聖物
方位座向，無論喺傳統風水學上，或是新興泰國法科，都屬重要一環。不過年年都係放財神、金魚、盆栽呢啲普通嘢，真係有啲悶悶哋，今年不如轉一轉，試吓跟陳師傅學擺泰式聖物，話唔定有意想不到效果！雖說同樣重視方位座向，但陳師傅嘅計算方法就同傳統有啲唔同，利用泰國法科，結合流年飛星宮位，計算出各方位所影響嘅不同運勢，再擺放不同聖物，達至催旺或化解，以收百煞潛藏、改運增福之效。
陳師傅默默計算：「2012龍年以六入中宮，所以飛星後，正南為桃花位，過去成年都無異性追求，又或人緣唔好嘅，放『蝴蝶符布』便可催人緣旺桃花。如果本身係『病壞』，喺東南及正北兩個大細病位，放『魯士刺wok』就可以化病，等你龍年健健康康。想讀書醒目啲？就要喺正東文昌位放支小小的『符通』。而東北就係喜慶位，如果想龍年辦喜事，記得放番隻『招財龜』喇。爭鬥位則處於西南，放個『啦壺』，小人統統埋唔到身。」講咗咁耐，大家最關心嘅財位又喺邊呢？龍年財位位於正西，但其實中央同西北一樣同「財」有關。於中央武曲位同正西，放「招財女神」都可以催財；喺中央擺埋「人緣鳥」更係有利升職！最後喺西北破軍位放「儲蓄老人」就催偏財，六合彩金多寶靠晒佢呀！
＊所有泰式聖物均屬非賣品，善信需向法科師傅「請」出聖物。
龍年座向
