歐洲股神安東尼波頓上周認錯，承認低估去年中的調整浪。去年波叔掌管的中國特別情況基金勁蝕接近40%，相比同期H股指數及滬深300指數分別跌22%及25%，的確跑輸一條街，究竟是否單純睇錯市咁簡單，股榮認為是波頓不了解國情所致。
先睇波頓威水史，其管理富達歐洲特別情況基金28年，1979年至2007年間每年投資回報平均為19.5%，每年跑贏大市6個百分點，故有歐洲股神之稱。波叔2010重出江湖，以為在歐洲成功經驗，可以在中國重新複製，點知捉龍變捉蟲。
根據去年3月底中國特別情況基金40大持股分析，當中30隻為港上市的紅籌國企，10隻是美國等外地上市，全部具有中國概念。講表現，40隻只有5隻全年有正回報，包括持倉最重的聯通（762）賺47%、華晨（1114）賺41%，有兩隻大嘢頂住都輸得甘，其他股份肯定跌到豬頭。頭十隻輸得最甘股份，最低消費跌50%，中盈國金（766）輸82%、聯邦製藥（3933）無咗72%。
錯判阿爺諗法肯定有排輸
老前輩教落，炒中資股要贏錢，最緊要睇啱阿爺面色，中國股市說到底就是政策市，跟住走就冇錯，其他甚麼PE、息率等已無關痛癢。歐洲股神揀股上無問題，但往往同中央政策對着幹。中國醫療需求很大，波頓個倉亦有唔少醫藥股，包括聯邦、ChinaMedical、碧生源（926）、WuXiPharma，但舊年阿爺三番四次調低藥價，佢仲唔醒水走貨，要怪只能怪自己太過天真，篤信本身一套行之有效。
波頓曾講過，投資股票時，最重要的不是目標價格，也不是資產配置，而是信心。我相信就是這種信心，令波叔對中資股遲遲不肯止蝕，在霸王（1338）事件上可說表露無遺。霸王2010年7月出事，富達事發後曾立即將持股降至5%樓下，其後9個月霸王銷售及股價一直下跌，富達居然在去年4月重新增持至5%以上，最高峯更增至6%以上。我一直想了解，為何霸王銷售插水、不斷發盈警，波叔及富達仍充滿信心，唯一解釋，是波叔用咗霸王，覺得好Work，用完很舒服，否則當所有基金都閃人時，波叔為何戀棧不去，犯下低級錯誤。
由4月至8月中旬，富達竟無聊到炒波幅，霸王股權在5.8%至6.2%上上落落，及至8月尾放榜前，富達始狠掟至5%以下，唔見棺材唔流淚，就係這種。
股市為經濟的晴雨計，對中資股絕不適用，今日A股竟同十年前一樣就是印證。價值投資在中國未死，只因它從來未曾活過。借用星爺喺《少林足球》同趙薇講：「你快點回去火星吧！地球是很危險的」。如波叔堅持用舊有一套投資中資股，我相信他今年仍會輸得好慘，「中國很危險，快點返歐洲吧!」
股榮