行年宵2：新城DJ惡鬥　花墟半價掃龍枕

行年宵2：
新城DJ惡鬥　花墟半價掃龍枕

年廿九，好多人都會去花市掃年貨，熱鬧一番，不過，如何才可買到筍貨呢？向來以口才出名的DJ們，就出動玩轉旺角花墟，示範一下講價奇技，五個人出動，揸住一千蚊買到滿載而歸，科林更憑住三寸不爛之舌，勁壓檔主半價，未到龍年先贏個勢！

記者：許福合、韓繼聰
攝影：周旭文

最受歡迎　Purple姐姐被人圍

Purple姐姐原來每年都有行花市習慣，今年有咩目標？「會去買吉祥物，亦想買風車轉個好運！」Purple姐姐現身花墟，遇到不少學生小朋友都跟她打招呼，可見有幾咁受歡迎！未揀到吉祥物，就已被近門口專賣3D揮春的中學生熱情招待，Purple見佢哋咁熱情，揮春作品又咁得意有趣，一行五人，一人一張喇！

■有公仔凸出嚟，真正3D揮春。$48（攤位13）

■見到Purple姐，小妹妹立即拉住不放手，熱情非常。

最為食　歐文詩愛飾物

今年犯太歲的歐文詩（Angela），去花市最想買銀柳，亦會順手幫朋友揀桃花。「都會揀吓公仔，更想試吓碗仔翅同燒賣。」睇唔出佢都幾為食！Angela先花了$70買即場扭製的飾物，仲成功令店主送佢糖葱餅，一邊品嚐一邊行花市，滿足晒！

■即場扭出自己個名，$70咋！（攤位11）

■開心氣球原價$20，成功格價，買4送1！（攤位5）

最爽　GiGi不求人

外國回來的GiGi，趁熱鬧行花市感都非常興奮，尤其喜愛在花市吃雞蛋仔，「今年亦都會去花市，主要買禮物同得意公仔，亦會買百合花回家過年！」以為佢會對龍公仔感興趣，估唔到反睇中不求人公仔，原價$28蚊一個，最後GiGi成功說服女店東$50賣兩個。一邊行花市，一邊用不求人按摩，爽住行喇！

■見你笑得咁甜，原價$28，$50蚊賣兩個畀你。（攤位12）

■外形趣怪嘅黃金果，$38一盤。（攤位85）

最合拍　細蚊精明眼

每年最少行兩次花市的細蚊，第一次買鮮花過年，另外會再同朋友掃有趣的賀年裝飾，今年她就計劃買風車及龍形擺設。行了一圈，明顯精打細算的細蚊才搵到目標出手，睇中鎚仔、鐵球吹氣公仔，原價$38蚊，與Purple姐姐合力講價，由合共$76減到$50蚊，爽！

■原價每款$38，最後以$50買走鎚仔同鐵球。（攤位5）

揼得勁　科林最強格價王

科林每年都會去行花市，而且仲非常精於格價，最厲害戰績係往年，「買一個iPhone吹氣機套，原價五十幾蚊，最後俾我講到十幾蚊交易。行花市，就係為執平嘢。」貫徹這個大方針，科林入場就開始搵目標，最後成功鎖定蔡龍攤檔的龍枕，食晒龍年Timing。經過一輪口水戰，原價$128的龍枕，竟然成功講到半價$64，不得不封佢做格價王！

■賀年龍枕，最後講成半價$64有交易，送埋服字畀佢。（攤位47）

戰績報告

■DJ軍團最後以$852買了價值$1,026的年貨，算滿載而歸！

■DJ們最喜愛這大半個人高的桃花。（約$300/攤位94）

■靚桔入手大吉大利！（每盤約$130/攤位147）

■科林見水仙未開花，想發功幫吓忙。（約$138/攤位135）

可愛檔主

■「唔好話我哋賣氣球咁大路，年年賣氣球都有得賺。」

■「我哋啲瑪利奧公仔同帽，似足我哋一樣咁可愛㗎。」

■「我哋賣嘅天燈用電㗎，夠安全，哈哈！」

■白龍套裝，連帽及手套，最搞笑包埋條尾！（$198/攤位46）

買得開心

■鍾家行花市，用$230元買了盆靚桔，另外花了$20買氣球給阿B。

■朱先生花了$200買了水仙及風車，還打算購買有趣的裝飾擺設。

■4位靚靚OL少女行花市Shopping，雖然未開齋買到心頭好，但已先品嚐了大堆零食。

■陳小姐陪媽媽行花市，用$50買了百合花過年。

迷你獅頭　仔學採青

至於沙田花市源禾遊樂場，佔地唔大，雖然乾貨區只得十幾廿個攤位，但勝在充滿活力，大把後生仔後生女搞旺個場！其中更有三檔係由大學生主理，青春無敵呀！講到貨品種類就唔算好多，大部份都係公仔、氣球呢類年宵必賣Item。其中一個由浸大同學仔搞嘅攤位比較特別，係賣獅頭！不過啲獅頭睇落縮咗水，原來係專畀小朋友玩嘅。近排香港興搞「獅藝」，可謂食正條水。講到玩潮流，另一個樹仁同學嘅攤位亦潮賣「那些年」小天燈，可以寫上願望，又可以着燈，都幾靚㗎！雖然沙田花市地方細細，但街坊落去打番個白鴿轉，隨時有意外驚喜！

■唔少小朋友見到小獅頭，都急住試番兩手，「獅藝」果然幾Hit喎！

■小朋友專用迷你獅頭。（$298/攤位19）

■各款Q版龍形公仔相當得意可愛。（$28-$78/攤位10）

■西瓜人公仔除咗可以攬，仲可以插雙手入去取暖，實用喎。（$128/攤位14）

■另一個樹仁同學攤位，佢哋就潮賣「那些年」小天燈，冧女OK㗎！

■攤位名叫「我的如意龍君」，不過套劇大結局咗喇喎。

■「那些年」小天燈（$48/攤位18）