今日是年廿九團年好日子，爆笑不離三兄弟的福祿壽阮兆祥、王祖藍和李思捷，今年亦首次約埋三家人一起食團年飯熱鬧一番。一向愛扮鬼扮馬的福祿壽更捧着年桔起舞，又以吉祥揮春向讀者拜早年，喜氣洋洋。
阮兆祥、王祖藍和李思捷自從07年在無綫台慶扮嘢演出一鳴驚人後，開始以福祿壽名義扮嘢銀，繼《福祿壽》節目再三添食，及先後拍攝電影和電視劇之後，下月4日福祿壽又將踩入紅館舉行《那些年，爆笑不離3兄弟演唱會2012》。
成小學生偶像
日前福祿壽接受專訪，本報並請來香港國畫大師兼無綫甘草陳勉良為福祿壽寫揮春，祝讀者新年大吉大利，行運一條龍。
問到福祿壽過去幾年賺了多少桶金時，祥仔謙虛說：「錢係搵唔晒嘅！好似最近我聽到有小朋友喺學校活動上扮福祿壽，開心到我不得了，原來喺小朋友心目中我哋係偶像，我哋原來影響到下一代文化，呢個責任感好重大，有小小使命感，呢啲係用錢買唔到。」
五虎紅館現身
思捷和祖藍表示，福祿壽除帶來金錢上得益外，更帶來友情，所以今年特地相約埋三家人一起食團年飯，可見福祿壽情同手足，早已是一家人了。
今個農曆新年，福祿壽將忙於綵排演唱會，問演唱會有甚麼撒手鐧時，祖藍預告說：「我哋會向秋官（鄭少秋）致敬，佢係扮嘢先鋒、一個legend，我哋會以丁蟹同楚留香造型出現，然後真嘅秋官會出埋嚟。」除秋官外，演唱會還有無綫五虎、四大天王、蔡楓華和韓國的Rain「現身」，堪稱史上陣容最強勁的紅館演唱會。
思捷說：「蔡楓華嚟緊會喺紅館開個唱，我哋想快啲幫佢實現夢想。」祖藍補充說：「有一part係無綫五虎，我扮梁朝偉，思捷扮劉德華，祥仔扮湯鎮業，然後有真嘅黃日華同苗僑偉出現。我可以同大家講，祥仔扮湯鎮業真係好似，大家睇到一定笑到碌地。」有傳無綫正聯絡劉嘉玲擔任神秘嘉賓，祖藍大賣關子說：「搞緊。」
採訪：戴彩煥 攝影：黃偉雄
化粧：K.TTsui（王祖藍）
髮型：TedofiiHair（王祖藍）、EddyKwong（阮兆祥）
服裝：Dicky（王祖藍）
