備受力捧的小巨肺林欣彤（Mag），早前才被踢爆與巨聲幫男友羅孝勇同居拖手，事業愛情兩得意。豈料昨日羅孝勇竟背住Mag偷食，被本報記者撞破他與落選亞姐羅昊昕撐枱腳。對於男友偷食斷正，Mag反應冷淡說：「佢嘅事唔關我事！」
林欣彤與羅孝勇前年因為參加無綫《超級巨聲2》撻着，雖然二人拍拖年半，但一直不肯承認戀情，就算早前二人被拍到拖手行街的照片，以及Mag趁羅孝勇父母外遊時入住男友何文田山一號豪宅試同居，但二人依然死口不認戀情。
不過，本報記者接獲讀者報料，指羅孝勇一腳踏兩船，雖與Mag拍拖，同時又力追一名家境富裕的索女，二人並相約於昨日下午2時在尖沙嘴TheOne的Full/Half餐廳撐枱腳。
一個耳筒兩份聽
記者接報後於昨日在餐廳守候，果然見到羅孝勇單拖現身。他入餐廳後不時四圍望，警覺性甚高。原來新歡一早已在餐廳等候，二人全程有講有笑，又一個耳筒兩份聽，關係看來並非普通朋友般簡單。二人在餐廳傾足兩粒鐘仍未言倦，記者遂上前追問羅孝勇，當他與長髮新歡見到記者時表現得相當愕然，之後二人急急除下半邊耳筒。問長髮女伴是否女朋友？羅孝勇刻意扮作淡定說：「唔係，呢位係我朋友。」背住Mag跟其他異性約會，難道不怕Mag不開心？羅孝勇說：「呢個係我朋友，之前我做過佢訪問。」
原來羅孝勇劈腿的對象，正是前年和去年曾參加亞姐面試的落選佳麗羅昊昕（Samantha），現年26歲，是心理學博士，曾為港台網上電台TeenPower擔任節目主持，羅孝勇曾接受她的港台節目訪問。
小三送禮冧孝勇
記者問到為何普通朋友會一個耳筒兩份聽時，羅孝勇即口窒窒說：「吓？我又想聽歌，佢又想聽歌……隔住張枱，都唔近，離開好遠呀！我同你一齊聽都得㗎。」跟羅昊昕約會前有否知會Mag？他說：「我哋（指他與Mag）都係朋友。」記者反問他與Mag被拍到拖手照片仍只是朋友？他繼續口窒窒說：「之前交代咗，多謝關心。」
記者見羅孝勇身旁放了一份用紅色紙包裝的禮物，莫非是羅昊昕所送？羅孝勇直認說：「係呀，呢份係佢送嘅聖誕禮物，我請番佢食餐飯。」一直表現得怕怕醜醜的羅昊昕此時亦點頭說：「係呀，手信嚟。」羅孝勇指盒內是朱古力，其後又為一個耳筒兩份聽解畫，指自己平時有作歌，所以叫羅昊昕聽一聽給點意見。之後羅孝勇與羅昊昕傾偈期間，巧遇其他巨聲幫，眾人傾談一會後，羅孝勇便自行搭的士急急離開。
「佢嘅事唔關我事」
身為正印女友的Mag，昨晚要到內地為私人派對做騷，記者欲問她對羅孝勇偷食事件睇法，她透過無綫經理人回覆說：「佢有自己朋友，佢嘅事唔關我事，普通食飯啫，唔代表乜嘢。」Mag經理人表示Mag獲悉羅孝勇與異性朋友約會後反應冷淡。
採訪、攝影：
文國駿、黃文成、楊浩賢
話你知：偷腥男星逐個捉
林欣彤男友羅孝勇昨日劈腿斷正，其實圈中不少男藝人都試過女被捉到應，當中以倪震偷食城大女生張茆最轟動。
錢小豪
01年與丘倩鳴結婚，03年被發現在上海拖着一名豐滿女子（左圖）。
倪震
08年背着女友周慧敏，在夜店與城大女生張茆啜爆斷正，轟動全城，事後與周慧敏「分」完又「婚」，峯迴路轉。
梁廷鏘
寇鴻萍丈夫梁廷鏘09年在酒吧公然熊抱一妙齡女子，更摸臀錫頸，梁事後堅稱自己飲醉神志不清（右圖）。
王浩信
快將為人父的王浩信，去年8月與YoYo結婚前被拍到接模Cammi返將軍澳家中短敍5小時。
資料來源：《蘋果》資料室