大肚日日呻悶的楊千嬅（Miriam），昨日破關宣傳新碟，雖然老公、奶奶到場實，但她一樣照着一吋半高踭鞋開工，仲開籠雀般又玩又傻笑。千嬅開心指fans為她腹中BB改名為RMB（人民幣），更笑言緊急要生時，都會衝公立醫院急症室。
楊千嬅懷第一胎龍B，本來要休息安胎，但抵不住悶的她，昨日出動在尖沙嘴舉行新碟簽名會，吸引大批fans撐場。腹大便便的千嬅穿上黑色短裙，但繼續拒穿平底鞋，千嬅和fans玩遊戲、收禮物時，不時摸住自己的凸肚，而老公丁子高、奶奶丁媽媽全程在台下實。
及後，千嬅坐下做訪問說：「真係怕悶呀！唔可以成日留喺屋企。佢（老公）驚我着高踭鞋，我今日着少少踭，腳踭落地有啲承托力，平底鞋其實唔好。」她坦言高踭鞋已經入倉，現在肥了8至10磅：「咖喱同辣椒就突然唔想食，海產、貝殼都唔想食，其他都幾吸收。呢排幾夜瞓，一點先瞓，老公就想我做農民，10點瞓，5點起身，我有時都瞓晏覺。」
胎教望靚仔
余文樂早前踢爆千嬅陀龍仔，她謂只照到七成，不肯多講，但笑住說：「微博啲fans幫BB改名，叫做RMB，我以為人民幣咁好笑？有錢梗係開心啦，原來係RealMiriamBaby。」千嬅指預產期為今年中，對於龍年產房緊張，她說：「私家醫院安排好晒，不過我好相信政府，我又做過公立醫院，緊急都可以去政府醫院生。」一向大笑姑婆的她笑言︰「我家要學胎教，要見靚嘢，聽好歌，所以我成日照鏡，上次見到吳彥祖都望多幾眼，同埋成日播自己嘅歌聽。」千嬅講到開籠雀般，傾到不願走。採訪、攝影：林嘉慈
