原來賣名牌袋一個月可以收2億，好賺過拍戲那麼多，好過你打生打死搵命博。不過拍戲的滿足感又豈止是一個手提包可以比擬，充滿光影魅力的電影依然是很多人的那杯茶，連原本以音樂為主打的何韻詩近年亦拍多了戲，先有在威尼斯影展參賽的《奪命金》，之後又在賀歲片《2012我愛HK喜上加囍》中演出，阿詩在戲中更跟黃宗澤（Bosco）有一場街外激吻戲。 撰文：駱華齡
何韻詩最近變成「國寶」郭晶晶？非也非也，今年有份拍賀歲片《2012我愛HK喜上加囍》的演員都玩變身，阿詩做了「郭晶晶」，曾志偉升高做「姚明」、加上毛舜筠的「郭美美」、黃宗澤的「樂易瓦」、邵音音的「沈佳宜」等，單是睇片中角色名稱這些爛gag已經笑爆嘴。
今次已是阿詩第二次拍賀歲片，她在片中與Bosco更有一場街頭激咀戲，阿詩扮演超級市場主管，與馮淬帆、毛舜筠和陸永演一家人，與Bosco做情侶，不過兩人在片中卻性別大兜亂，Bosco會做乸型男友，而阿詩就做man爆女友。
自覺有喜劇細胞
阿詩自言本身甚具喜劇細胞，只是平日埋沒了這種天份，對於今次面對多位超班喜劇演員，阿詩自誇不會接不到眾人的爆肚：「梗係唔會接唔到，我根本就係喜劇演員，而且志偉都好少爆肚，喺佢哋身邊學到唔少嘢，始終以前香港電影全盛時期嘅喜劇演員就係佢哋，佢哋演繹好有個人風格，同毛姐合作好享受，女演員中佢係最好笑嘅三甲。」
近兩年阿詩參與了不少電影，亦有做舞台劇巡迴，問她會否期望在電影上得獎以獲得肯定？阿詩直言不會多想，並說：「我會做好每個角色，始終獎係好講緣份，同埋睇整部戲，唔同歌手係好個人，電影係teamwork，我係比較幼嫩嘅演員，慢慢儲多啲經驗先。」
希望遇上好導演
阿詩認為現時她接拍電影的首選是考慮導演多過角色，如果遇到她十分欣賞的導演，她自言甚麼題材也會嘗試，即使是同性戀及性感也會認真考慮，阿詩說：「好似許鞍華導演，佢將啲好平凡同日常生活嘅角色拍得好好，因為我相信佢係有品味嘅導演，如果佢搵我拍好性感嘅角色，同埋個角色需要，我係會願意，當然全裸就要諗吓，撇除裸露嘅話好多嘢都可以嘗試，自己亦好想同佢合作。」
阿詩覺得，一個演員能夠獲得電影獎項，有一半功勞都歸功於導演，因為無論演員演繹得如何出色，但如果沒有導演的剪接及指導等各方面的帶領，演員一定發放不到內在潛質。
髮型：KarmanWong@HairCulture
化妝：ArrisLaw@JMmakeup
服裝：izzuecollection(I.T.)
《我愛HK》4大場口
老版那些年
電影《那些年，我們一起追的女孩》的熱潮仍未減退，《我愛HK》就用了片中的經典場面來搞笑。在《我》片中演沈佳宜的邵音音跟馮淬帆相逢時，想起那些年他們曾發生過的事，令一對老情人重拾初戀感覺，鏡頭不乏《那些年》中陳妍希跟柯震東放天燈及一齊罰企的場口。
旺角當眾咀
黃宗澤因為誤會何韻詩以扮大肚來逼婚，一怒之下打算跟何韻詩分手，最後兩人冰釋前嫌，有情人終成眷屬。兩人和好後，一向娘娘腔怕醜的黃宗澤，就在旺角街頭當着過百觀眾及臨時演員面前激吻甚具男子氣慨的何韻詩，場面震撼。
女人大作戰
受過高等教育的毛舜筠的同學都出身富貴，她跟高海寧經常勾心鬥角，偏偏毛毛老公曾志偉卻出身寒微。在一次同學聚會，高海寧以高價投得志偉上台為她做一件事，高海寧要志偉數落老婆，心無城府的志偉逐一爆出毛毛的瘀事，令她非常尷尬。
追女遭奚落
陸永一直傾慕明星張馨予，不惜跟她的富商男友蘇永康展開爭奪戰，為博紅顏一笑，陸永不惜潛入酒會赤裸上身扮侍應，希望可以憑此贏得美人歡心，惜張馨予不為所動，還被蘇永康發現，並將陸永拋落泳池。
馮淬帆、邵音音末日之吻
馮淬帆及邵音音在《2012我愛HK喜上加囍》中演一對歡喜寃家，戲中大玩大熱電影《那些年，我們一起追的女孩》的經典場口，不過結局自然是有情人終成眷屬，當中更有一場親吻戲。
雖然馮淬帆演出經驗豐富，但拍親吻戲依然感到尷尬，他說：「以前我拍嗰啲戲都好似冇呢啲戲份，我都唔知呢個算唔算係螢幕初吻，太肉緊嘅我都唔會做，因為始終都一把年紀，自己睇戲都怕睇到啲老人家喺度錫啦。」
擺明索油
反而音音姐卻沒半點尷尬，她笑言：「擺明係我索佢油，我點會尷尬呀，同埋呢套係喜劇，錫錫嘅場面都係好溫馨，我唔會覺得會令人睇到有性衝動囉。」
音音姐在戲中演《那些年》的沈佳宜，她表示因此片近日大熱，所以才會用這個名字。談到《那些年》這個話題時，在台灣生活的馮淬帆反而全不知情，亦反高潮表示沒看過此片。
《我愛HK》的故事跟傳言2012世界末日一事有關，馮淬帆相信有這一天的存在：「地球都係一嚿石，佢始終都會有一日有事，真係末日嘅話做乜都冇用，總之大家有乜嘢想做咪平時做囉，唔好等到就快死先做。」音音姐則說：「我直腸直肚，鍾唔鍾意都會第一時間講出嚟，做乜要等到末日就快嚟先講。我亦冇plan過到時會做乜，plan都冇用，因為到時都未必會照住自己個plan做到，每日都要有珍惜同感恩嘅心。」
撰文：李珮洳
攝影：陳志嵐
故事大綱：愛要及時
《我愛HK》講述以父親郭靖（馮淬帆飾）為首的一家之故事，大女郭美美（毛舜筠飾）是名律師，丈夫姚明（曾志偉飾）負責打理家務，二女郭晶晶（何韻詩飾），戀上娘娘腔的樂易瓦（黃宗澤飾），卻未能得到父親的首肯結婚。孻仔郭富城（陸永飾）地位低、心頭卻高，立志要從富商Roberto（蘇永康飾）手上，奪取明星女神Vivian（張馨予飾）。
郭靖原本享受平凡但幸福的生活，但因誤會令家庭關係破裂。
末日泯恩仇
郭靖一氣之下離家出走，無意中聽到世界末日的消息。因為末日令所有衝突頓時化解，身份、地位都不再重要，人們反而更懂得尊重互愛，是上天給郭家甚至全人類的一個自救機會。