好一朵迎春花，人人都愛它，今日年廿八，洗完邋遢，係時候安放好喺花市買嘅心水年花！年花除咗可以佈置到屋企靚靚之外，原來年花擺位仲可以影響你龍年運勢，香港淳道玄學總會會長方海閱師傅，今日就教大家擺個好位，行個靚運！
記者：陳家蕊
攝影：黃子偉
Model:Martin、Suki、Issac、Yellow@PureModels
鳴謝：尚禮坊
嚴重警告
西北放花易破財！
屋企其實有啲位，唔可以亂放年花！好似西北位（歲破位），就不宜擺放任何植物，否則會招破財。而另一面「五黃位」即東南方，及病符位即「正北」就忌放綠色及紅色植物，否則災瘟、病痛會較多，健康運就會唔多妥，所以話嘢唔好亂食，花都唔好亂放！
擺花要擇時辰
想盡善盡美，教大家擺花之餘，都提提大家要夾番個最佳時辰。今日嘅上午九點至下午一點前，以及下午七點至下午九點前都係吉時。另外，提醒大家要小心打理自己嘅年花，因為放盤爛的年花喺屋企，隨時轉唔到運不特止，好可能會影響健康運㖭！
桔 開門大吉大利
位置：大門
將大桔放門口，有大吉大利之意，另外亦適合放在武曲位，即是全屋的中央位置。
栽種小貼士：每四日先可以淋一次水，而葉片亦要間中噴灑。
桃花 利人緣兼催情
位置：正南
可以催旺人緣、貴人同愛情運的桃花，要放於正南位置，單身嘅隨時有伴過情人節呀！
栽種小貼士：不宜水太多，以及要有充足的陽光。
五代同堂 快快手生龍B
位置：東北
全為果實的五代同堂，要擺放東北位，此為喜慶位，可以催旺生育運，子孫昌盛，想生龍B就識做啦！
栽種小貼士：淋水時，不可整濕果實，否則會好容易生蟲，以及果實發黑。
紅色劍蘭 幫你斷絕是非
位置：西南
因為西南位是今年的是非位，紅色的植物可作化解之用，除了紅劍蘭，亦可放火百合。
栽種小貼士：劍蘭易臭，宜在水中加入數滴漂白水栽種，水量為半個花瓶即可。
富貴竹 開工讀書爽利
位置：正東
將水種的富貴竹放於正東文昌位，有利於小朋友的學業運，而且對大人的事業及工作運亦有幫助。
栽種小貼士：不要令其根部受損，每星期用清水加數滴漂白水，換水一次。
牡丹花 財源滾滾來
位置：正西
大家最想知的財位，在正西方，放牡丹花可以催旺財位，大富大貴；小朋友利是都會多啲。
栽種小貼士：保持凍水栽種，不適合太暖的天氣，水溫1℃-5℃最適合開花。
