以為「食貓面」是因為貓兒高竇，給你臉色看。不瞅不睬或當面訓斥省到一面屁，都是「貓面」，令人難堪下不了台。
「呢單嘢搞成咁，老闆聽日一定秤我入去食貓面。」
「你輸咗半份糧，返去老婆實行畀貓面過你食。」
雖曰「面」，也要「食」，不過與一碗「麪」無關。
作為領導、上級、老虎乸，當然威過你，惡過你，寸過你，面色難睇過你。誰叫你做錯事？出漏子？矮半截？活該挨罵。
不過「食貓面」不但不是「麪」，且與「食」和「貓」亦毫無關係。其實音誤。
原來是「識貌面」─畀個貌面你識。「貌面」即嘴臉、眉頭眼額、面色……肯定是不高興啦，黑口黑面好難頂。如果喜氣洋洋開懷歡笑，又何須「識」如此自律，戰戰兢兢？分享便是。所以此詞是負面的。擺款，你自行估量，識時務知進退，有錯就認，鬧就企定。
在政壇商界名利圈，以至情場愛海，總有人騎住你食住你，所以你要學習去識他/她的貌面。忍辱負重，卧薪嘗膽，當你高升、掌權，便讓人來辨識你的嘴臉了。十年媳婦也熬成婆。