去年娛圈不少中女脫離敗犬行列，年屆45歲的粵劇名伶蓋鳴暉有見事業如日方中，就算感情枯乾至少20年，她都不渴求異性滋潤，寧可全心全意寄情工作，一於繼續皇帝女唔憂嫁。撰文：比華利
蓋鳴暉縱橫粵劇界超過20年，原來她初中時瞞着媽咪去報名學大戲，先斬後奏成為梨園弟子，想當年一心想做花旦，卻被班主安排做文武生，至今演出超過2000場粵劇，她還有永不言休貢獻業界的心願。蓋鳴暉自爆入行後雖有追求者，但全部冇feel請吃檸檬，更無懼dry爆，要事業不要愛情。
追求者唔啱心水
45歲的熟女蓋鳴暉保養得宜，除樣貌較真實年齡年輕，身形也十分苗條，原來身為一個文武生有禁忌，她說：「作為文武生一定要keep住條腰，出台要保持小生應有嘅風度，咁樣先發揮到一份舞台魅力。」換句話說，蓋鳴暉平日豈非除練功外，也冇啖好食？她說：「咁又唔使，我基本唔揀飲擇食，開騷前會小心飲食，但完騷後暴飲暴食補番數，可能平時捱更抵夜，食幾多都唔吸收。」蓋鳴暉認為辛苦搵來志在食，所以她放假時絕不待薄自己。
蓋鳴暉自爆已逾20年冇拖拍，她堅決不做年晚煎堆，並坦言：「我真係唔恨嫁，將來有冇另一半我都唔心急，拍拖嘅嘢我相信緣份，早兩年仲有人追過我，但全部都唔啱心水。馬仔（馬浚偉）仲試過取笑我唔拍拖冇人生樂趣。不過，我其實好享受家生活，我愛活喺自己嘅童話世界。」蓋鳴暉雖冇愛情滋潤，但不怕寂寞，她說：「我休息都唔願出街，最多係叫朋友返嚟屋企打吓麻雀。」蓋鳴暉表示09年經歷過舞台跌傷尾龍骨和親人離世，噩運接二連三，令她人生觀改變，一切知足常樂。
騷前戒甜飲保聲
事業心極強的蓋鳴暉希望秉承師訓，一生貢獻粵劇，她和阮兆輝為首的鳴芝聲劇團，將於本月26日到下月12日在北角新光戲院演出賀歲粵劇，新光下月便結業，這是他們最後一次在那裏演出，份外珍惜。蓋鳴暉過去演過無數劇目，問到最愛哪個角色，她說：「係牡丹亭嘅柳夢梅，呢個角色好風流瀟灑。」為保靚聲和唱腔，蓋鳴暉公開竅門說：「人哋話開騷飲啲潤嘢，但我經驗係一定唔可飲黐嘅飲品，好似益力多、奶類飲品同蜜糖水都唔可以飲，咁樣會封實喉嚨開唔到聲。」
帶愛犬穿梭海陸空
藝人承受壓力大，不同人有不同減壓方法，蓋鳴暉的減壓方法是躲在家中弄狗為樂，她家中飼養了兩頭松鼠狗啤啤和Lady二世，未婚無兒無女的蓋鳴暉視兩狗如寶貝女。
直踩新光後台
蓋鳴暉擁躉無數，一對愛犬每次都直踩後台探班，啤啤和Lady二世每次都雀躍為「媽咪」打氣，令她演來更投入。蓋鳴暉更搞笑大談愛犬巴閉經歷，她說：「佢哋試過陪我海陸空周圍去，海係搭船入長洲做神功戲，陸就少不了入新光後台，至於空就陪我坐長途飛機去多倫多探師傅（林家聲）。」
愛犬雖不能用說話安慰蓋鳴暉，但身體語言卻教主人感受至深，她說：「試過我有時病唔開心，佢哋會好嗲係咁挨埋我度，用身體語言畀關心訊息我，狗女又零舍嗲，所以我揀工人，首要條件係佢哋要錫我啲狗，唔錫狗就冇得傾。」