鄭大班個數碼台，噚日趁住兔年最後一個工作天，換埋個董事局主席。佢間香港數碼廣播有限公司，獲政府開綠燈，准許佢哋搵「亞瑟王」李國章出任主席及董事，正式取代「深圳李嘉誠」黃楚標。
政府新聞稿話，亞瑟王大佬李國寶係電盈董事，根據香港廣播業嘅「防火牆」條例，亞瑟王就唔能夠同時喺其他電子媒體做話事人。不過，行會研究過後認為，寶哥哥只係做電盈獨立非執行董事，對電盈日常運作冇影響力，所以就算俾亞瑟王做埋香港數碼主席，廣播業都唔會俾佢兩兄弟玩晒。亞瑟王就承諾未來喺董事會一定唔會受大佬影響，亦唔會參與討論同時關乎香港數碼與電盈嘅事宜，叫大家放心。