皇馬喺禮拜三西盃8強主場輸畀巴塞，比比（右）喺場波嘅踩手劣行人神共憤。可能佢見教練摩連奴喺賽後都唔撐佢，就即刻走出嚟同俾佢踩親隻手嘅美斯（左）公開道歉。比比喺前季曾經發神經無端端踩人搞到被重罰停賽10場，皇馬方面可能都怕會重蹈覆轍，實行自己做啲嘢平息下外界怒氣先，據講會對比比進行內部處分停賽15日，即係聽晚西甲同西盃次回合都唔使預佢。