山頂大宅何東花園倚山面海，座北向南，遠眺香港仔，無遮無擋，遙想當年何東爵士嘅平妻張靜蓉女士在生之時，與一羣仔女（十位，一位早夭）在此生活，好不逍遙，豪門大宅，自當如是也。
張靜蓉在1938年去世後，大宅漸趨寂寥，何東爵士好少時間住在何東花園，主要係住在西摩道（現香港花園）。何東花園在打仗時俾英軍徵用，受日軍轟炸，破壞了不少，大戰後，何東索性將間大屋半修復，半重建，內部大改裝，間隔為六間住宅，分租予人。何東大把錢，何以要將間屋用今日術語講，「劏樓」出租？後人只能猜想，何東對間屋無甚懷念，索性將佢改到面目全非租出去。至到六十年代初，其七子何世禮將軍取回與子女卜居於此。
天寒日稀之午，何東花園業主，何世禮將軍嘅千金何勉君女士邀請左丁山與三位傳媒朋友到何東花園一遊，以瞭解呢間所謂歷史文化古蹟大屋之實況。只見內裏屋地約四萬呎，前臨斜坡，坡下有沿着地勢高低起伏而營造之花園，種有桔樹、梨樹、柚子樹，果實滿地，無人執拾；花園一分為二，中有小溪，流水潺潺，何女士話係山上面流落嚟嘅，佢五十年前在此嬉戲，溪水清澈可飲，但現在已恐遭污染，不敢用以沾唇。
花園低處有一小亭，已殘破不堪，亭上有曾國藩、左宗棠、康有為、梁啟超對聯題字，大編輯話：「如果係真跡，咁就價值非同小可！」真乜鬼吖，何東花園在1927年興建，梁啟超在1929年過身，其他更早不在人間，字跡一睇就知係後人（工匠？）臨摹嘅，無文化價值可言。何女士帶我地由小亭行斜路上山，見有觀音池，觀音像已如甩皮殘石，面目模糊；池水係山澗水流入，自然流動，唔會養蚊，然後有一個約二十幾呎高嘅木塔，四面有封實嘅木門，何女士話純係裝飾之用，佢從來冇入過去，根本亦入唔到。返回大樓，參觀三個住宅單位，要重新大規模裝修過先至可以住人，七十幾歲嘅何女士慨嘆話：「我住呢度五十年，好有感情，想拆咗重建為十座獨立屋，自己住番一間啫，所有花園設施保留不動，政府有乜理由唔俾呢？我好唔想政府動用幾十億納稅人嘅公帑嚟向我買，政府有幾十億閒錢不如用嚟起醫院！」