胡杏兒農曆年要獨自返內地拍劇，所以佢日前特意宴請劇集《換樂無窮》嘅演員王浩信、李詩韻、朱咪咪、石天欣、佘杰樺、劉江、蔣志光同監製林志華提早食團年飯。
唔肯派利是
戲中分別演杏兒弟弟同外甥女嘅佘杰樺同石天欣，當日提早向杏兒拜年逗利是，杏兒即詐嬌話：「我派？我都未結婚！係都搵王浩信啦！」杏兒仲話家以工作為重，暫時冇計劃同男友黃宗澤結婚。杏兒將要獨自離港兩個幾月，佢話未試過一個人過年：「唔知到時會唔會覺得好寂寞，所以今次特登請佢哋食飯提早團年，順便當歡送我。」
劇中扮夫妻嘅李詩韻同王浩信一到場就派利是，王浩信將會過婚後首個農曆年，佢家最緊張係老婆陳自瑤腹中乖女，佢話：「諗到囡囡就出世就有啲緊張同擔心，聽講孕婦臨生前個幾月，好需要丈夫喺身邊，老婆預產期係6月，但我3月仲要去上海拍一個月劇，都驚陪唔到佢，惟有一得閒就返香港陪佢。」