《基本法》委員會委員劉迺強上星期喺信報專欄《大陸與港》發表退伍軍人桿菌入侵新政府總部、係生化恐怖襲擊嘅「膠」文，認為香港要盡快為23條立法，咁嘅謬論被不少人狂插，劉迺強噚日突然喺facebook自爆，《信報》前日正式終止其專欄，但冇講同上述「膠」文有冇關。
喺左報開地盤撐CY
劉迺強自《信報》創報起寫專欄近30年，如今「被收爐」，佢話「舊嘅唔走，新嘅點嚟？長江後浪推前浪；我們一切應往前看，我的一個小小專欄無足掛齒，香港特首選舉、未來社會是否更公義、外國勢力在香港對我國穩定發展虎視眈眈才值得我們關注」。自言係劉迺強忠實讀者嘅沈旭暉，話對消息覺得莫名失落，稱即使唔認同劉迺強觀點，但其文字功力毋庸置疑。
此處不留人，劉迺強叫fans唔使擔心佢封筆，因為已經有後路，就係轉戰《大公報》，2月初至3月底會一連寫40篇「給下屆特區政府的公開信」。左佬喺左報開地盤撐CY，合情合理，正所謂癡癡呆呆，坐埋一枱吖嘛。