早排傳媒問到係咪豬咁蠢時，以「我龍年出世」作回應的唐唐，噚日食住龍年將至個勢，會後不惜由公關阻止記者追問問題，亦要喺扑咪時段抽時間向市民拜早年，其間大講「龍」字開頭賀年說話，包括「龍」馬精神、「龍」年進步等。有記者問佢驚唔驚今年犯太歲，佢只儍笑冇回應。
被問到點解唔講吓特首選舉相關賀詞時，噚日民調顯示民望上升的唐唐諗咗諗，就話：「節節上升好冇？」唔知唐唐係咪High得滯，講完呢句，就表演個神「龍」擺尾，踩低幾條咪線，掃跌幾個電視台咪牌，嚇到身旁女公關大嗌：「大吉利是！唔好倒台呀！」捉住唐唐快閃離開。
至於不獲工聯會邀請出席論壇的白鴿黨仁哥，噚日亦不愁寂寞，去咗維園年宵檔同黨友表演打破地產同政治霸權。