一對準備在龍年拉埋天窗的新人，卻因一場飛來橫禍令他們在年廿七陰陽永隔。車禍中慘死的廖家駿，為了準備在龍年結婚，近年搏命賺錢，幸福近在咫尺，但偏偏天意弄人，未婚妻昨晨趕赴醫院見家駿最後一面，哭得死去活來。
昨晨8時許，家駿未婚妻在親友陪同下，到屯門醫院認屍，其間她淚如泉湧，聲嘶力竭大哭。兩小時後，死者父親、胞弟、未婚妻、老闆及工友等一行人，轉到出事現場路祭，滿眼車禍痕迹，未婚妻哭得鼻紅眼腫，要親友安慰。有親友慨嘆：「點解新年前搞單咁嘅嘢？」
廖父表示，家駿孝順顧家，每月都有給家用，最近剛開始供樓，不料就出事。有家駿工友指，死者工作認真，甚少發生意外，「份工工時好長，收工成個人都散晒，家駿如果唔係瞓着咗，有反應可能識得保護自己，唔會咁樣」。
《蘋果》記者