特首曾蔭權噚日最後一次以特首身份去年宵做騷，例行公事都係買花、買公仔、買小食，簡直係「煲呔行花市方程式」。
煲呔噚日同老婆去咗元朗東頭工業區嘅年宵市場，扮晒嘢左睇右睇，其實佢買乜嘢、幫襯邊一檔、幾多錢全部都係「預製組件」，噚日只係嚟「攞貨」。
有位嶺大學生Gary中途殺出，揸住隻香蕉公仔希望煲呔買，但由於煲呔行程中冇打算幫襯佢，所以佢身邊班保鑣即時推開Gary，仲講大話：「買咗喇！」冇買話買咗，做人老實啲好喎。Gary大嘆，預咗佢係嚟做騷，唔係真心嚟行花市。
煲呔唔老實點只呢樣，佢散水前同班記者講，知道元朗東頭工業區呢個年宵市場好多年，「我喺新界（工作）時已經有呢個年宵市場」，查實元朗年宵市場05年先搬嚟呢度，嗰陣時煲呔已經係政務司長。講大話唔眨眼，唔知就真係以為佢同元朗好friend。