後日踏入龍年，消費者委員會選出兔年十大消費新聞，結果由2,192市民投票決定。近日hit爆全城嘅「雙非孕婦」令私家醫院大幅加價，令港媽「冇位生仔」嘅新聞名列榜首，一共獲2,007人投票支持。其次就係兩家電力公司加價高於通脹。
榜上有名仲包括日本地震引發港人「盲搶鹽」、食物通脹上升、台灣塑化劑風波，以及水貨客搶購奶粉、小店賣平貨遭欺壓。
消委會主席張炳良話，私家醫院收取嘅生仔費用，雖然由市場決定，但醫院也有責任要照顧本地孕婦，亦都應該提高收費透明度。他又促請政府盡快通過競爭法，加強打擊壟斷市場嘅行為。