送兔迎龍，八方收爐，初四開市，先同各位讀者拜個早年，祝大家龍年行大運，龍馬精神、恭喜發財。言歸正傳，「新界王」發叔每年都向車公廟為香港求籤，年尾流流，八方大掃除時搵番張車公靈籤出嚟，一睇，準呀！
兔年大年初二，發叔幫香港求咗支「威人威威不是威」中籤，玄學家麥玲玲同八方講，車公呢支籤好準，批中香港過去一年表面風光，股樓齊升到頭來都係一場空，整年計都係冇威過。
政策朝令夕改失民心
籤文係：「威人威威不是威，只當着力有箴規；白登曾起高皇閣，終被張良守舊圍」；籤文解曰：「凡事守舊，求財遂意，自身得運，婚姻不合」。麥師傅指，2011上半年股樓齊升，點知下半年恒指跌突，樓市亦都由升轉跌。賬面進賬，得個睇字。
特區管治嘅表現，就同籤文更加對嘴。麥師傅話籤文提及嘅張良係劉邦謀臣，為劉邦取得唔少民心，所以籤文提醒政府要廣納民意，點知煲呔今年因為唔聽民意，政策朝令夕改，交通津貼如是、替補方案如是、連大拿拿動用庫房幾百億大派6,000蚊亦如是，派錢冇掌聲只得媽媽聲，真係「威人威威不是威」，意思就係唔好畀表面風光迷惑，潛藏暗湧。
《蘋果》去年亦為唐唐同CY求籤，同車公一樣咁準，唐唐係中籤，CY就係上籤。籤文批唐唐「蘇武牧羊」，話民望落後嘅唐唐仍在艱辛掙扎，叫佢要意志堅定，不要受外界影響，可能係叫佢唔好受浸大民調影響，仲叫佢凡事忍耐，做多啲公德。
至於CY，上年就獲「劉向得志」嘅上籤，籤文話佢終於發圍，苦盡甘來，吐氣揚眉，仲會平步青雲開拓未來的大業，同時提醒佢戒驕戒躁，最忌得勢不饒人。
麥玲玲：唐唐有特首相
但CY呢支上籤就聽日過期，要等車公龍年初二再批二人運程。麥玲玲就教大家睇相，佢話唐唐明顯有「特首相」，最煞食係佢下巴夠力，「佢下巴兜兜，晚年無憂。佢係有啲運，雖然唔係特別聰明，好彩有貴人，做特首有運係好緊要㗎」。反觀梁振英兩邊鼻翼薄，財運、福份弱，「佢係一朝成、一朝敗嘅人」。
睇相要睇整體，麥玲玲做睇埋豬唐夫人。佢話唐唐老婆郭妤淺有副開心滿足相，笑起上來有雙「腰果眼」，福份好夠。梁振英老婆唐青儀唔夠sweet。估唔到1,200位選委仲都未開始提名，CY已經輸喺「老婆睇相戰」中輸咗。
CY忌得勢不饒人
流年：大旺發，有苦盡甘來，揚眉吐氣之吉兆。
事業：從此平步青雲逐步開拓未來的大業。
自身：戒驕戒躁，最忌得勢不饒人。
唐唐兔年艱辛掙扎
流年：仍在艱辛掙扎中，要意志堅定。
事業：無論您在創業還是守業，都不要受外界影響。
自身：凡事忍耐，多作福，多做公德。
mailto:[email protected]