邊個先係今場主角？C朗老茄啫；美斯配角嚟咋；主角其實係皇馬嘅比比。佢今場不斷發揮演技，先插水，再惡意踩向美斯，賽後引發朗尼同古迪嘅罵戰。
下半場，比比同法比加斯爭波，慢鏡所見，法比仔隻手輕輕喺佢塊面左邊揩一揩；比比就好似俾法比仔嘅內功打中一樣，掩住右邊面倒地，但佢過咗陣都聽唔到雞聲，撐大眼一望，球證已經行到冇雷公咁遠，惟有好冇癮咁起番身。
既然球證唔太欣賞佢做受害人嘅演技，不如轉個角色，做番殺手仲好。當時美斯俾人侵犯跌低，正想起番身嗰陣，比比知道表演嘅機會又到，佢借啲意行過美斯側邊，扮到好似唔覺意咁，一嘢就踩落美斯隻手度！美斯痛到彈起，而比比就好瀟灑咁行開，球證毫無表示，比比嘅演技終於得到球證嘅認同嘞！
朗尼古迪爆罵戰
球證睇唔到啫，但遠在英國嘅朗尼就喺電視度睇得一清二楚，仲喺Twitter度鬧比比係白癡！皇馬名宿古迪出嚟幫口，話朗尼其身不正，唔好扮聖人走出嚟話人。文：咖喱