楊穎（Angelababy）去年主攻拍電影，昨日不忘趕回港賺錢。在北京零下三、四度抵冷、受傷拍片的她，坦言在溫暖的香港開工，十分幸福，新年更可以和家人去旅行。Baby年紀輕輕已體會演員之苦，她謂希望BabyCafe可以開夠七間，朝女強人之路進發。
楊穎昨日在尖沙嘴出席海港城賀年活動，抱抱財神，又收到財神送「掂」字揮春及蛋糕。Baby穿上前短後長的紅色單肩裙，不怕冷風，站在海旁邊影相，她說：「啱啱喺北京返嚟，三日冇瞓趕到煞科，完成晒手頭上嘅戲，返到香港覺得好幸福。香港好暖，北京就零下四、五度，好凍。」
「每個月都賺錢」
Baby開心透露新年終於有假放，可以和家人去旅行，暫定返內地玩。早前有傳她和黃曉明秘密結婚，她說：「我冇結婚，結嗰一日會話畀大家知，幸福係要分享。」Baby謂暫沒打算結婚，長期拍戲只想到工作，只想趁後生做多點工作。Baby年紀輕輕，去年已經成為餐廳老闆娘，最近更火速開分店，她說：「開咗第二間，希望開多幾間，目標係想開多五間。」回本未？她說：「每個月都賺錢，但未回本呀，蝕本生意就唔做啦。」
拍跳樓戲腳震
自言想做女強人的Baby還說：「希望做到啦，演員生涯唔長久，要早啲鋪路。」做演員拍電影絕對辛苦，Baby透露之前拍動作片，有場爆炸戲由腳底爆上來，傷及手背，但並沒燒傷，她說：「試過有次要由三樓跳落去，腳都震埋。」問海棉蛋糕是否心痛？她說：「冇，對佢嚟講係小事。」
採訪：林嘉慈
攝影：陳志嵐