【本報訊】「你兇我呀？玩嘢！」十多名男女前晚在旺角食團年飯，聚會暢飲後，疑有人年尾思舊債，觸發同枱爭執打架，杯碟橫飛大混戰。近30名警員趕至時，兩名魁梧醉漢爆粗，被帶走時更突然發難反抗，要分別由6至8名警員人叠人按倒地上制服，事件中3人被捕。
記者︰江寶龍
被捕的3名醉漢，一人姓聶，兩人姓葉（年齡41至49歲），其中一名姓葉男子涉嫌打架被捕，另外兩人疑因打架及拒捕被捕。現場所見，其中一名反抗最激烈戴帽醉漢，體形健碩孔武有力，在酒精影響下極為勞氣。
事發為花園街街市大廈熟食中心，前晚深夜11時許，十多名男女到上址食團年飯，各人享受酒餚，原本有講有笑，其間疑有人追舊債，眾人因錢銀紛爭言語衝突，同枱食飯亦告反目。多名大漢拍枱起身拳來腳往，女伴亦制止不了。一時間酒樽、杯碟碗筷、餸菜橫飛。
女伴不斷哭鬧
超過30名衝鋒隊及軍裝警員，帶同盾牌警棍等防暴裝備趕至制止群毆，將最少3名互毆醉漢隔開查問，當中一人被酒樽扑至頭破血流，右眼中拳即時腫如雞蛋，眼睛瞇成一線，由救護員包紮止血。
另一名戴帽醉漢，被多名警員包圍調查，手指指激動斥喝︰「你係咪兇我？玩嘢！我投訴你！」其女伴情緒激動，上前緊抱男伴哭鬧求情，及用手掩着男伴的嘴，避免雙方再起爭執。但醉漢不肯擺休繼續吵鬧。警員忍無可忍喝令︰「你好啦吓！我叫你坐低，冷靜啲！」
警方經調查，採取拘捕行動，戴帽醉漢突然發難，高舉被鎖上手銬右手喝罵︰「喂！你鎖住我乜嘢意思呀！」最少8名警員為免場面失控，當機立斷群起人叠人，將疑人按倒地上。同一時間，亦有最少6名警員，以同一方法將另一醉漢壓倒制服。女伴尖叫哭鬧不斷，場面混亂。
經兩分多鐘糾纏，群警控制場面，警方極為克制未有使用過度暴力，除讓戴帽拒捕醉漢喘息，亦無阻記者直擊拍攝拘捕行動。警方最後將3名互毆醉漢，拘捕送院敷治。
而戴帽醉漢的女伴事後向警員咆哮︰「係你哋鎖起佢，唔俾我老公講嘢，佢先會咁樣！」其後，她又改向在場記者叫嚷︰「你哋成班人，都冇人聽我講嘢！你哋明唔明？我衫爛咗，我指甲爛咗，冇人理我！」