雖然n年前某廣告嘅標語係：邊度都有陽光，不過，碧咸相信同新X士甜橙一樣，最享受加州陽光，因為呢名36歲中場，日前決定同美職聯球會洛杉磯銀河續約兩年，好大機會喺美國收山；而一向顧家嘅碧咸亦表明，留效同家人有好大關係。
碧咸喺舊年助銀河贏得美職聯總冠軍後，由於同球會嘅5年合約屆滿，所以隨即傳出「萬人迷」將會重返歐洲球壇，當中又以加盟法甲球會巴黎聖日耳門（PSG）機會最大。不過碧咸最終都係決定留隊，佢在日前發表聲明表示：「呢個係一個重要決定，過去一段時間我收到來自世界各地球會嘅邀請，不過我對於喺美國比賽嘅熱情依然未減，仍希望可以協助銀河贏更多錦標。」佢又話：「我同我家人喺美國好開心，而且已經安頓好晒，我哋都好期望將來好多年都留喺呢度。」
聽老婆話長居加州
碧咸於07年由皇家馬德里轉投銀河，並簽下5年合約，年薪達600萬美元（約4,680萬港元），雖然暫時會方未有透露新約待遇，不過，從球會隆重其事，喺官網開咗個碧咸專頁（www.lagalaxy.com/BeckhamIsBack），就知道佢哋唔會虧待碧咸。而且，正如碧咸話齋，佢留喺美國，對家人及自己都好。首先，一向聽老婆話嘅佢，知道老婆嘅時裝設計事業喺美國搞得有聲有色，而且4條化骨龍喺講英語嘅美國成長，點都好過喺法國。
另外，碧咸都知自己年紀唔細，如果佢真係去PSG，喺1月已經要開始比賽，唔似得喺美職聯咁休閒，可以令佢有足夠體力應付倫奧足球賽；再者，PSG班油佬唔講得笑，如果碧咸表現有乜閃失，俾人炒咗，咁咪衰收尾？諗過度過，始終都係加州陽光好。
