呢兩年M4/3機勁Hit，多咗好多人拎相機隨街Snap，不過四圍走，難免招惹塵埃污迹，有損觀感兼夾影響埋相片質素。正值年廿八洗邋遢，唔好懶，今日教埋你用唔同嘅清潔筆同抹布，簡簡單單幾分鐘，順手幫心愛鏡頭洗白白！
記者：許福合
攝影：伍慶泉
Model：Mandy＠PureModels
外科 鏡頭篇
1.塵埃微粒
鏡頭可以話係相機取景的第一線，因為經常對外接觸，最易積麈，這是無法避免的，無論室內室外，經過一段時間使用後，鏡片都會鋪上一層塵埃和微粒，輕微嘅暫不對器材有大影響，但長期不理，便會因招惹細菌而造成污迹。
Solution：氣泵
塵埃微粒比較易處理，使用時並無特別技巧，只需留意將鏡頭打側，便可較易吹走麈粒。但要注意氣泵嘴要離開鏡面約4cm左右，避免錯手刮傷鏡頭。
效果：事前事後
法寶盡出後，跟筆者征戰連連的污鏡終於靚番晒，恍如新鏡一樣！
2.指模油迹
除了積麈，更可能會沾滿指模，甚至油迹同水迹，這些污迹比較頑固，出動氣泵亦吹不動，嚴重時會減弱光線進入鏡頭，大大破壞拍攝效果。
Solution1：鏡頭布
鏡頭布方便隨身攜帶，與氣泵可組成一套相機清潔組合。先用氣泵將麈粒吹走，然後用鏡頭布輕柔地抹鏡頭，由內向外抹便可避免積聚指模在鏡面。
Solution2：鏡頭筆
鏡頭筆亦是另一種適合隨身攜帶的清潔工具，留意筆嘴含有碳粉，但神奇地在抹過鏡頭後，不會將碳粉留在鏡面上，且有效抹走鏡頭上的污迹，但要注意當碳粉用完，除污能力會減弱，大約可使用300次左右。使用方法同時是由內向外打圈，不用太大力，輕輕抹去污迹便可。
Solution3：鏡頭紙＋水
當氣泵、鏡頭布都用上，還是有污迹殘留嘅話，就要出動撒手鐧—鏡頭紙及鏡頭水。將數滴鏡頭水滴在鏡頭紙上，輕輕搓鏡頭紙，保持柔軟狀態，再在鏡頭內至外打圈拭抹，最後換上新鏡頭紙抹乾鏡面便可。
查詢：dcfever（27811780）
內科 感光元件篇
感光元件可以說是相機的心臟，直接影響相片質素，尤其時下流行的換鏡相機如M4/3等，因為無反光板，當更換鏡頭時，感光元件會直接曝露空氣下，積麈機會更高，雖說不少相機廠內置除麈功能，可震走麈粒，但用家最好還是定期動手清潔，保持相機最佳狀態。
Solution：啫喱筆
取出鏡頭後，會見到鏡面一樣的感光元件（若要清潔單鏡反光機，須要設定快門Bulb），啫喱筆筆頭柔軟而帶有黏性，使用時必須輕力抹過表面，千萬不要來回掃刷。建議購買一次性的啫喱筆，用完即棄，避免重複使用已沾污的舊筆。
查詢：日昇數碼（27703710）