就到新正頭，一眾善男信女又係時候要去上炷香、求支籤、祈個福。不過人多煙霧瀰漫嘅大場面，唔係個個頂得順，用Apps搞掂就方便得多！拎住Tablet或iPhone，搖出籤文後，仲會即時幫你解埋籤，有啲Apps甚至要求你擲埋聖杯，絕對認真！
記者：韓繼聰
攝影：譚盈傑
Model：AnladiaChinmy@InterplayWorkshop
場地提供：荷里活廣場
上網拜神 雲端祈福
除咗求籤，拜神祈福亦係重要一環。喺呢個上網時代，獻花、致敬，拜神祈福等，自然都可以上網搞掂。「嗇色園」官方網頁有一個「網上祈福」服務，過程相當特別！先有一段短片環境Shot，俾你有「走入」黃大仙廟嘅感覺，之後填上簡單個人資料同祈福事項，就會出現有人代你上香嘅短片，祈願仲會隨輕煙輕輕飄上天，仲唔係「雲端」祈福？果真「i世代」！
嗇色園網頁： http://www.siksikyuen.org.hk/public/
籤筒都有得揀
唔好以為用Apps求籤就當Hea吓玩吓，認真上嚟一樣可以跟足細節。Android嘅《求靈籤》App，製作可以話係一絲不苟。一入App有多個神明，觀世音、城隍、文昌等等，俾你揀到啱為止。設有不同籤筒款式任君選擇，之後就不斷搖機，求出籤文後再擲聖杯作實，睇吓擲出笑筊定沒筊，同真實求籤一樣！若然怕搖到手軟都擲唔到聖杯，App亦提供簡易版，俾你齋求籤睇結果，相當細心。解籤方面，就好正路咁提供咗簡單吉凶事宜同籤文簡義，但要詳細深解，就要自己研究吓喇。iPhone方面，亦有款《妙有、黃大仙靈簽求簽機——有求必應》App，雖然過程無《求靈籤》咁多步驟，但勝在種類夠晒多，有成十五項，想問家宅、愛情、事業，任得你。不過解籤內容頗簡單，玩味較濃。
《求靈籤》三部曲
《求靈籤》
（Android，免費）
《妙有、黃大仙靈簽求簽機——有求必應》
（iOS，$0.99美元）
玲玲免費教投資
睇風水書亦係近年熱門選擇，一眾風水Apps中最出名一定係麥玲玲師傅。主要講龍年大運同新一年投資預測，想睇埋個人生肖、出生日期等詳細運程，就盛惠US$6.99升級完全版，不過玲玲師傅咁紅，加上App設計同排版都唔錯，抵睇嘅。
另一位雲文子師傅來頭亦唔細，係「2009年國際十大易學風水名師」，佢嘅App有齊十二生肖運程，內容頗詳盡，雖設計簡單，但睇落有唔少用家讚話好準，最緊要係免費！
《麥玲玲龍年運程（2012）》
（iOS，免費/完全版US$6.99）
《雲文子2012龍年運程》
（iOS，免費）