周秀娜喺影壇發展越嚟越好，下月情人節佢有兩部電影《夜店詭談》同《惡胎》喺內地上映，由於兩部都係鬼片，佢即時被封為驚慄女王。
娜姐日前帶埋師妹何佩瑜（Jeana）同余曉彤（Hidy）到廣州見粉絲，順道谷兩部戲。娜姐坦言呢兩年拍得太多驚慄片，搞到佢變得疑神疑鬼同精神緊張：「所以我決定要『停驚』一吓，拍吓其他片種過冷河先。」
Jeana想打Edison
娜姐亦言出必行，稍後會同Jeana和Hidy合拍動作片《功夫嬌娃》，三人仲會港女上身，不時搵男友做出氣袋，娜姐自爆現實中佢都有試過咬同打男友Avis手臂：「佢手臂好好打，亦都冇反抗，不過佢家學緊詠春，諗住抗衡我囉。」一向敢言嘅Jeana就話最想打淫照主角陳冠希（Edison），佢話：「Edison又靚仔又抵打。」
另外，模DaDa（陳靜）噚日喺新蒲崗出席龍騰賀歲匯演，大會請咗中國內蒙古雜技團到場表演，仲教DaDa玩雜技，不過佢着短裙玩踢碗雜技起飛腳時，唔小心露咗打底褲，其他啲低難度動作佢又全部做唔到，真係羞家。