台灣大選結束，國民黨小勝民進黨，老狐狸宋楚瑜雖然在總統選舉大敗，得票不足2.8%，票數不夠三十七萬，但點票後面有喜色，原來親民黨贏咗三個立法院議席，比上屆多出兩席，達到咗「不泡沫化」嘅目標，果然係老謀深算，圍魏救趙成功。國民黨小勝不足八十萬票，大部份評論認為贏在九二共識，ECFA，一言以蔽之，就係台灣商人及不少選民擁護經濟安定，驚住蔡英文上台就會搞亂檔，破壞兩岸關係，令工商企業冇啖好食，故此大富豪、大財團紛紛挺馬棄蔡。
咁講法，馬英九是不是搞官商勾結？廣義來講，所有資本主義經濟體系若想維持低失業率，合理經濟增長嘅話，政府政策少不免pro-business（親近商界），與商界作對嘅政府通常唔會維持得幾耐，除非有軍人槍桿子支持（如北韓、緬甸），或者大把石油錢頂住（如委內瑞拉），馬英九要穩定台灣經濟，讓台南農民產品有市場，冇法子唔向西望過台灣海峽，政治上創製有利環境，讓台商可以過海峽發財，呢道門一打開咗，就不能收回，中國人口實在太多，逼近十四億人，零頭都多過台灣加香港，只要有四分一人口富起來，就係另一個美國消費市場，係任何企業難以抗拒，包括Google在內，呢間公司最近咪想盡辦法，猛搵藉口，想話重返中國咩。
蔡英文唔肯講九二共識，猛講台灣共識，招大富豪張榮發（本來親綠）、郭台銘、王雪紅等人所忌，於是佢地齊齊挺馬，令蔡英文損失大量商界票，係勝負關鍵，假如蔡英文都講埋九二共識，背書ECFA，好可能已經成為第一位女總統。政治人物如蔡英文或者講原則啫（從佢地嘅台獨意識出發），但商人與普通選民講搵飯食，難以認同蔡英文咯。在民主選舉老祖宗國家如英國、美國，每次選舉都講失業率，記住克林頓名句"It'stheeconomy,stupid"（講經濟呀，蠢人！）香港就有不少政客只講「民主原則」，不講經濟，即使今日有咗雙普選，佢地仍然會輸。