兔年股市跌到一仆一碌，好多資金都轉晒落避險資產，黃金等商品不斷造好，恒生（011）食住嚟緊龍年個勢，今日推出「恒生千足金條」（圖），想搶金舖生意乎？
恒生話，以前佢哋賣過叫「財神金牌」嘅金條，不過只係得5至20克重，今次嘅係龍年特別版金條，分別有100克同埋10盎斯兩種，份量就重好多。華華噚日先睹為快，金條係長方形設計，正面印有龍年圖案，背面就有恒生Logo，含金量有99.99%，即係所謂「999千足金」，以禮拜一現貨金價計，最平嘅100克盛惠4.3萬銀，貴啲嗰件要成13.2萬。恒生仲話金條有龍年特色，用嚟送禮或者投資就最啱。不過今日落定，最快都要2月先攞到貨，趕唔切做賀年禮物喎！