勁迷《OnePiece》嘅木村拓哉，年紀唔輕都仲爭住做男主角真人版路飛，而嚟緊PS3獨佔嘅《航海王：海賊無雙》，食正人氣漫畫加無雙玩法，基本上無得輸，望埋部金黃色PS3，嘩，靚到不得了！相信木村爭唔到男主角嚟做，都一定會搶部同梱版PS3返屋企！
文：阿洛
由97年到今日，《OnePiece》漫畫在日本已售出超過兩億本，動畫、相關遊戲更係大收特收，就連山手線車站、車卡，都貼滿《OnePiece》公仔，更有時事評論員稱之為「OnePiece現象」，人氣咁爆，最適合用嚟做《無雙》系列。雖然個個打《無雙》打到呻悶，不過今次乘埋《OnePiece》牌頭，更加唔似星矢咁得個名，堅係由ω-Force無雙團隊製作的無雙系列！呢隻《航海王：海賊無雙》，故事將收錄由藍海到新世界嘅最新劇情，遊戲中還重現多個經典場面，如狙擊王火燒政府旗幟、司法島救羅賓、告別梅莉號等等，主角路飛當然有兩年後嘅新造型，而且更可以發動二檔狀態，將海軍水兵打爆晒。遊戲內更會收錄大量激昂、熱血又感人嘅場面，而卡通化嘅畫面亦都可以凸顯到《OnePiece》嘅漫畫風格，Fans好難走得甩。
爽快都要反應快
以往無雙成也爽快敗也爽快，因為獨沽一味無腦齋劈，煲爆幾十個角色簡直係考你耐性。今次就多啲嘢玩，除狂㩒四方掣同三角掣、以一敵千拳拳到肉外，仲要活用路夫等草帽一夥嘅惡魔果實能力，好似遇到某啲關卡，主角就要伸長對手，甚至令身體膨脹反彈攻擊先過到關，考你腦筋兼有唔同變化。另外仲會加入近年隻隻動作Game都有咁滯嘅QTE部份，跟畫面㩒掣考反應，令機迷更投入當時劇情，就連過場動畫都有得玩，成隻Game比其他《無雙》實在過癮得多。
特別版毒性極強
《無雙》×《OnePiece》，廠方大把放血方法畀Fans！輕度粉絲可以齋買Game過吓手癮就算；初回版就送9款主題下載卡；「毒性」重少少嘅就梗係訂TreasureBox，除遊戲碟外，仲有設定畫集、15種徽章集、原聲CD等。至於嚴重到好似木村嗰隻，唔使諗，PS3主機同梱版啦，大大隻金色路飛圖案印喺機面，堪稱PS3史上毒性最強！
《航海王：海賊無雙》
類型：動作
平台：PS3
廠商：NAMCOBANDAIGames
售價：約$820