過氣球星喺亞洲嘅最新落腳點，再唔係日本或者中東，而係印度。印度嘅足球水準可能唔高，但勝在人工高、工時短，啲咁嘅筍工，去邊度搵呀？皮利斯同其他名宿好似係基斯普、文尼捷、摩連迪斯同埋奧高查等，就齊齊去印度掘金，順便感受吓做土皇帝嘅滋味。
印度喺1991年開始進行經濟改革之後，經濟增長得好快，連個印度超級板球聯賽仲搞得有聲有色，其中孟買印度人嘅市值仲達1.12億美金（約8.7億港元）。除咗板球，佢哋仲想搞旺埋足球，於是印度足總就同CMG（TheCelebrityManagementGroup）簽約30年，仲會透過對方引入前國腳嚟踢波，搞個星光熠熠嘅印度超級足球聯賽。首季印超聯會有6隊參賽，每隊陣中會有王牌球員，首年班費有250萬美金，球員最高薪金上限係60萬美金。消息仲話，CMG經已斟掂7個老牌球星，當中包括皮利斯同埋基斯普等（見附表）。而由今年2月25號至4月8號，各間球會可以競投自己嘅心頭好。
踢8星期執幾百萬
近排喺舊球會阿仙奴跟操嘅皮利斯就話：「我喺歐洲了無牽掛，點解唔試吓去一個自己從未去過嘅地方闖一闖。我好榮幸可以成為第一個去印度踢波嘅法國人。而且頭尾淨係踢8個星期，根本唔算係啲乜嘢。更何況，佢哋真係出得起錢，如果我間會個老細鍾意我，我隨時執成100萬美金，試問我仲點可能吊高嚟賣。不過，我唔會當自己係遊客，諗住去印度玩。今次對我嘅足球事業嚟講，絕對係新挑戰。」
錢冇錯係易搵，但印度嘅生活環境就遠遠及唔上歐洲，睇嚟皮利斯等過氣球星真係要有心理準備至得。曾經喺印度比賽幾年嘅本地深水埗球會的巴西前鋒山度士表示：「印度本土球員每個月有2,000蚊美金，外援有成5,000至7,000美金，而且仲會有車有樓。另外，比賽喺夏天舉行，日頭可以熱到40度，都幾難頂，但球迷真係好多，聯賽入場人數閒閒哋有2、3萬。」我求大俠都相信班過氣星去印度志在搵錢，但都希望真正有貢獻，等亞洲多一隊強隊，同日、韓及澳洲鍊吓。
