新年幾日假除了要拜年，又要睇煙花、拜黃大仙，租部車出入的確方便唔少，今年仲可以租電車直插停車場泊住叉，唔只零油錢，連搵位泊的時間都慳埋！
記者：李鑒泉
攝影：蔡家輝
Model：TakiLam、BooKwok
@m.spymodel
4日3夜$2,860
年初一馬不停蹄去拜年、初二晨早去霸靚位睇煙花、初三又要去黃大仙求神，放假隨時仲忙過返工，與其出街搭車同人逼，一家大細租車隨時最化算。想再慳啲？索性租部電動車，慳回的油錢食多餐飯都仲得！日產LEAF能輸出109匹馬力及280Nm扭力，不遜2公升級別私家車。加上大昌行汽車租賃新年推出租車優惠，4日3夜租金$2,860，平均每日$715，仲平過租車廂細一個碼的VWGolf。
「租電車怕唔怕中途無電㗎？」唔使驚，據廠方指LEAF的續航距離有160公里，即使八折後仍有128公里，出入市區無問題，另外ECO模式亦可額外「榨出」約20公里。儘管如此，租車公司還是建議來回郊區途中停車充電。另外要時刻留意位於錶板右方的電量計（非剩餘里數），如跌至紅色水平就要準備充電，切忌冒險挑戰電池極限。
初二霸「位」睇煙花
年初二晚煙花滙演年年都吸引幾十萬人到維港兩旁觀賞，唔少人更未夠下晝3點就已經到海旁霸位等夠鐘。今年匯演以「龍珠獻瑞萬家歡」做主題，發放約4萬枚煙花，其中「飛龍在天」更會從躉船一時順時針、一時逆時針發放煙花，營造飛躍效果，雖然製作單位指遠至北角都可清晰欣賞煙花，但又有哪個位置較尖東海旁來得震撼?!睇煙花熱點之一的海運大廈去年增設電動車專用泊位，無論幾時都唔使同其他人爭位泊，因位置鄰近收費處，去海港城shopping或是露天停車場也很方便，插頭即插即充，插足幾個鐘充電都無有怕。不過倒車進入的車位設計，對車頭充電的LEAF而言，泊位極考功夫，要小心。
海運大廈停車場
電動車車位：3個
每小時收費：$20；11pm-7am：$8
（以電子貨幣於海港城消費$200或以上，可享2小時免費泊車）
查詢： http://www.harbourcity.com.hk/parking
初三吉時到黃大仙求神
初三赤口不宜拜年，翻查通勝卻是祭祀好日，去黃大仙祠求神就合適不過，但當日日間只有申時（下午3至5時）是吉時，附近停車場一定大排長龍。幸好屬於領匯的龍翔廣場停車場亦有電動車專用位，一落車旁邊就是升降機，行去黃大仙祠只是3分鐘。從購買拜神用品、排隊入場到禮成離開，兩個小時大概可以補充2至3格電力，大約可續航多30公里左右。與海運大廈不同，駕駛者在這裏泊好車後需要到旁邊的輕觸式屏幕選取充電時間及用八達通卡進行確認，屏幕又會有預計充電時間等資料，不然LEAF車頭亦有3盞小藍燈顯示充電情況。不過Taki首次使用時有點手忙腳亂，場內職員見情況亦主動過來協助。
龍翔廣場停車場
電動車車位：3個
每小時收費：假期$14；平日$13；11pm-9am：$9
查詢：67967324
5分鐘學識叉電
租電車的手續與一般租車無異，填寫好個人資料及繳付租金後就可揸車出發。出發前職員除了會檢查車身，更會教授如何使用車頭的叉電插口、如何檢查剩餘電量及行車里數，Taki唔使5分鐘就學識。由於電車扭力隨傳隨到，所以有需要的話更可要求職員陪同試駕一圈，方便掌握行車特性。另外車上又有全港逾330充電站地址，方便駕駛者編排行程。
大昌行：27682277
http://www.dchml.com.hk
電動車輛充電設施位置一覽： http://www.enb.gov.hk/tc/resources_publications/guidelines/files/charging_points.doc