粵港合作，容許香港人揸車上廣東，廣東人揸車嚟香港，已提上議程，今年下半年預料可以實行，屆時我地可以申請一張一次性嘅內地行車證，揸車直去汕頭、湛江、肇慶，咪話唔爽，淨係揸車去東莞廣州作周末遊，已經過癮啦，至於內地交通安全，道路安全，遇上路霸打劫搶車嘅機率，咁就要自己度到掂，屆時唔好怨三怨四。至於廣州人揸車來港會唔會造成極大交通負荷，令中環銅鑼灣新界北區嘅塞車嚴重化，唔諗得咁多咯。講逼，交通係雙向嘅，冇理由只係准我地上廣東，唔准粵人駕車來港嘅。
中貿S從商會中聽到政府諮詢商界嘅消息，係有關「一次性行車證」嘅收費。中貿S問我地肯俾幾多錢，我地幾個人都話一百至三百港元一日係可以接受嘅，去一個星期就俾一千，到北海道租車自駕遊，租車費你估便宜咩？點知中貿S話我地講嘅價錢太貴，與高官心目中數字相差甚遠，高官只想收三至五十元一日，彌補吓海關嘅開支啫。我地噓聲四起，話收得太平，對納稅人唔公道，左丁山呢類係乞人憎派，認為「方便駕車遊」必須用者自付，有車之人，有司機之人，俾得起就應該俾到足，唔好要冇車之納稅人津貼。津貼甚麼，有數得計，海關要加聘人手處理過關事宜；道路負荷增加，要增加道路維修；車流大幅度增加，碳排放隨之而來，清潔空氣要用錢搭夠，凡此種種，梗係要方便駕車遊人士支付啦，一日俾三百元（隨口噏數字），冇乜唔得呀！如果政府只收每日五十元嘅話，左丁山一定抗議。
「方便駕車遊」係為港珠澳大橋熱身嘅啫，到大橋落成之日，大家已習慣咗揸車去珠海，行港珠澳大橋嗒晒糖啦。到時澳門一定唔俾外來汽車駛入，香港車只能停在珠海停車場，再坐的士巴士去澳門。澳門目前已經塞到飛起，容納不了外來汽車嘅，至於珠海有冇足夠停車場，到時先至知。外匯M話澳門旺到出奇，年初二三出到九千蚊一間套房，仍然租唔到威尼斯人，反而拉斯維加斯嘅威尼斯人就打電話offer俾佢新春房間免費，拜內地同胞所賜，澳門已成為世界賭場之都！