阿仙奴上場幸有「國王」亨利打救，後備入替建功先小勝列斯聯1:0，驚險地晉級英足盃；周日英超聯賽，就算再有亨利後備上陣都救唔番，後防連番犯錯，作客2:3不敵史雲斯。亨利或者打電玩遊戲《AngryBirds》多，賽後真係憤怒了，原本去到客隊球迷區答謝球迷，結果變成同球迷小衝突。
作客2:3不敵史雲斯
阿仙奴作客史雲斯原本有一個好開始，喺杜拜度假叉足電嘅尹佩斯，5分鐘單刀建功，將聯賽入球增至18個；點知成班中後場就好似做咗慌失失奇兵，16分鐘艾朗藍斯無端端踢跌尼敦戴亞，搞到輸12碼，史葛冼佳亞一聲唔該射入，追成1:1。
換邊後尼敦戴亞自己都整番球，史雲斯反超前2:1，呢個時候兵工廠球迷自不然希望亨利再做救世主，63分鐘後備入替，6分鐘禾確特就追平2:2，以為國王真係咁好腳頭？點知不幸事件喺1分鐘後發生，基菲爾施古臣一個美妙直線，丹尼格拉咸乘客軍門將施捷斯尼出迎猶豫，窄位射入，再度領先3:2；亨利今場冇波入，阿仙奴就繼輸畀富咸後，累積聯賽兩連敗。
亨利話晒曾經係球隊隊長，賽後就算輸波，都好有風度咁領球員走到客隊球迷區度，多謝兵工廠球迷遠道去到威爾斯打氣，點知就有一名兵迷好不滿咁大鬧：「你哋嘅鬥心喺邊？你哋嘅戰鬥精神喺邊？」只穿打底內衣嘅亨利，就手指指，似叫球迷落球場當面對質；亨利就怒吼回應：「球迷要喺背後支持球員，唔應該咁消極。」不過球會事後就解釋，亨利絕唔係好似英國傳媒咁講，想同嗰位球迷隻揪！
球迷挑釁 亨利手指指
亨利同球迷開火，阿仙奴領隊雲格就向球證同後防開炮，雲格先批評球證，史雲斯個12碼唔應該判，另外就插後防犯咗唔應該犯嘅錯。呢場波阿仙奴冇出阿迪達，艾朗藍斯做中場指揮官，就只顧賣弄腳法，佐羅、米基爾、哥斯尼，位位都慌失失，睇怕佢哋入到更衣室，雲格同「憤怒鳥」亨利輪流向佢哋呢班豬仔兵團發炮好過！