榮登內房巨頭嘅恒大地產（3333），近排不停傳出裁員，又話佢強制淘汰員工。呢排市場雖然唔好，但係恒大仍然有增長，點解要咁樣放棄自己？華華聽到都嚇一跳，主席許家印噚日親自澄清，「員工成本比例就只有零點幾個百分點，裁員5000人，才可以省5000萬元，可能沒有，對於發展商（盤數）而言，根本不是對比（唔成比例）。」
只係減「定編」人數
恒大舊年大大話話都做咗成800億生意，舊年年底有大概3.2萬名員工，傳裁員30%都唔夠1萬人，慳埋都唔夠1億，又真係冇乜用。之不過，網上真係流傳一份恒大炒人嘅文件，許主席就解釋話，佢確實有簽發過相關文件，不過唔係裁員，係減「定編」人數。
「定編」即係如果一般做一個項目要10個人做，以前高增長，所以請人要請18個，方便日後新項目開工有足夠人才。所以呢，減定編30%即係一個項目請少3個人，但仲有5個人緩衝，佢話咁並唔係裁員，仲話今年要請多5000人喎。講到尾，都係cut人囉。