金融海嘯未完全退潮，香港經濟又俾歐債危機重挫，港人對未來可謂憂心忡忡。港大有調查就話，香港人覺得自己可以安享晚年嘅信心指數只係得6.1分，低過上海嘅6.9分。
七成港男繼續做
香港人對退休嘅憂慮主要因為未來有太多未知數，好似通脹高、經濟變差或者失業，惟有搏老命搵錢。調查嘅500個港人當中，打算做到65歲嘅大有人在，其中70%港男都覺得自己60歲後，依然要繼續喺工作崗位上奮鬥；港女比例就係53%，預計到咗花甲之年都仲要搏殺緊，冇得唞！兩者比例都遠遠多過上海嘅66%同11%。唔通香港人真係覺得錢唔夠洗？
美國萬通保險亞洲高級副總裁蕭莉玲話，除咗經濟波動，港人過去廿年嘅平均預期壽命不斷延長，男女到2039年出生時嘅平均預期壽命，分別會有84同90歲，隨時可能因為太過長命而失晒預算，所以香港人對咪要搏命銀囉。咁如果搬去上海住，係咪可以早啲退休呢？