華華發現近年講廣東話嘅公司高層、賓架越嚟越少。無他嘅，今時今日好多公司請人都特別情傾「海歸」（即係放洋歸來嘅內地人才），貪佢哋兩文三語夠好，背靠祖國，無論喺商界定官場都冇咁易撞板啦！就連財經記者，海歸派數目都正以幾何級數上升！
昔日海歸大有前途，不過近排內地報道，海歸已有少少「供過於求」，矜貴不再。有內地傳媒搞咗個「2011年海歸就業力調查報告」，調查咗全國7800名海歸，只有一成半月入過萬人仔，一萬樓下有七成，有逾四成月入唔過5000蚊人仔，部份更要待業，成為「海待」！主辦單位解釋，呢幾年海歸質素參差，鍍金率早已大打折扣。單單一張留洋沙紙唔再有太多優勢，還原最基本，睇重嘅係能力同經驗，先至係職場致勝條件。