龔如心遺產案掀起連場爭產大戰，華懋慈善基金同陳振聰不停打官司，十足溏心風暴，估唔到爭權奪利嘅場面會蔓延到華懋同陳振聰有份持股嘅宏霸數碼（802）身上。
近六成股東反對
話說宏霸上周六喺大馬開股東會，就公司配發最多兩成新股嘅授權進行投票，點知有58.81%出席股東反對，否決咗配股授權議案。照道理，宏霸董事會由陳振聰好友話事，配售新股好可能係陳振聰一方嘅意思。華華翻查資料，發現宏霸舊年已經配股4次，擁有龔如心遺產嘅華懋同陳振聰持股量已分別被攤薄到13.31%及10.85%，若果今次真係華懋否決配股授權，相信都搵咗唔少股東「幫手」。
不過話時話，華懋對宏霸呢隻殼都未必太重視，反而擁有唔少物業嘅安寧控股（128），可能至係華懋最重要嘅棋子。點都好，睇嚟宏霸嘅內部鬥爭，唔會咁快完結。