巴塞後衞碧基同大過佢成10年嘅拉丁天后Shakira喺上年公開戀情，好多人都唔睇好。不過姊弟戀唔代表一定唔可以開花結果，聽講佢哋已經有咗愛情結晶品，碧基打算喺今年同Shakira結婚，做龍年老襯生龍B。
Shakira被爆陀龍B
樂壇天后同球壇王者，Shakira同碧基本來大纜都扯唔埋。Shakira喺上年主唱南非世盃主題曲，碧基就幫西班牙贏世盃冠軍，之後冇耐就傳出兩個人秘密拍拖，到上年當事人終於認係拍緊拖。
就快35歲嘅Shakira，啱啱好大碧基10年，咁嘅配搭自然多閒言閒語，牛頭角順嫂都話睇死佢哋好快會散。不過事實又唔係咁喎，雖然過去1年都傳過Shakira忙於巡迴演唱會冷落咗碧基，又有報道話碧基越軌偷食，但實情兩口子感情一直好好。西班牙《Intouch》雜誌爆料話Shakira已經有咗幾個禮拜身紀，佢今年會暫停自己嘅音樂事業，喺龍年為結婚同生仔做準備。
碟可以唔出，但波就點都要繼續踢，碧基今年都幾忙，除咗要幫巴塞繼續稱霸球壇之外，另一個大project就係夏天嘅歐國盃，西班牙4年前贏冠軍嗰陣碧基冇份踢，今屆以主力身份出戰自然搏到盡，順便用歐國盃冠軍獎牌用嚟做Shakira嘅結婚禮物。
料在巴塞隆拿行婚禮
碧基同Shakira嘅確實結婚日子仲未定，不過佢兩個有共識會喺巴塞隆拿當地舉行婚禮。巴塞隆拿既係碧基嘅家鄉，Shakira家亦都已經喺呢度住，搞埋婚禮都係順理成章，到時仲方便一班巴塞隊友嚟到賀。
雖則愛情係唔可以用金錢去衡量，但事實係自從碧基同Shakira拍拖之後，收入亦隨之豬籠入水。佢哋嘅受歡迎同注目程度就好似碧咸同維多莉亞咁，成千上萬嘅球迷同歌迷都留意住有關佢哋嘅消息。有人同碧基計過數，同Shakira拍拖後單單係廣告收入一年就有900萬歐元（約9,000萬港元），認真唔講得笑。有個咁有才華嘅貴人喺身邊，Shakira對碧基嚟講真係娶得過，加埋預計喺年尾出世嘅龍B，事業有成加埋一個圓滿家庭，碧基今年真係龍咁威。