一向投資舖位有道、有舖界「神奇小子」之稱嘅黃海明，近幾年炒舖得心應手，不時都聽到佢未到成交期之前「摩出」舖位賺錢離場嘅消息。之不過，華華近日收到消息，話佢以5250萬銀「摩出」觀塘一個舖位，足足比舊年8月買入價低咗300萬，咁咪要蝕錢？華華當然立即打畀佢問清楚啦！
收唔到舖割價再賣
黃海明同華華證實，的確以5250萬賣咗觀塘仁安大廈地下面積600呎嘅K舖，不過就絕對冇損手離場。此話何解？個舖本身面向康寧道，但原來單成交本來仲包括一個面向通明街嘅「廁所」位，兩個位唔係黐埋一齊，係真真正正差「成條街」。
最大問題係，個老牌原業主原來唔知道個「廁所」喺邊，個位仲俾人「逆權侵佔」咗嚟賣嘢，到成交期之前都交唔到「廁所」位畀黃海明。所以黃生就同原業主傾，可唔可以唔包個「廁所」再成交過呀？就係咁樣，個舖就比原先平咗450萬銀，以5100萬成交！如是者，今次黃生「摩舖」賬面一來一回反而仲有150萬賺。
至於個「廁所」幾大，黃海明話佢同原業主都冇度過，唔知實際面積，「不過頂多都係幾十呎」。呎價咪隨時超過10萬銀？一個「廁所」值成450萬，都夠買太古城500幾呎細單位囉！
李華華
mailto:[email protected]
