嚿年《爽報》加入戰團，免費報界百家爭鳴，《am730》大股東施永青早前喺自己個專欄話：「黎智英先生是不會讓《am730》因他不肯承印而死亡的……他叫我不要為續約問題擔憂。」一波未平一波又起，有報道話施老闆唔睇好樓市，賣咗啲商廈物業套現逾億，上星期華華見到施老闆，梗係要捉住佢問一問啦。
想搵肥佬黎合作
施老闆就愁住咁同華華講，《am730》加印問題有啲阻滯，廣告部啲兄弟有時博命call廣告返嚟，最後都落唔到，要推番啲客轉頭，見財化水，梗係愁上加愁。講講吓就唔覺意爆咗個秘密畀華華聽，佢話自己一向都睇好物業投資，早前傳佢賣樓其實係有「實際需要」。
原來賣樓急住套現，係想走去買架印刷機自己印報紙，諗住印幾多就幾多，之不過施老闆冇幾耐就褪軚，因為一架每日印40萬份有64頁報紙嘅印刷機，價錢要3000幾萬……係美金呀，即係要兩億幾港紙！加上擺部機樓底需要成30幾呎高，就算搵到地方設廠，仲要補打椿，加固地台，由零到一都要搞成年。施老闆之後笑住同華華講：「喂，不如你幫我同肥佬講，我哋合作搞啦！」唔知佢係咪好心急，跟手仲話自己遲啲會親自搵肥佬黎傾吓至得。
李華華
mailto:[email protected]