銀行講求同存戶之間嘅誠信，若果銀行唔守信，仲有邊個敢幫襯？最近內地有傳媒報道，一位存戶22年前喺中國農業銀行（1288）做咗個儲蓄計劃，講明存入2000蚊人仔，到期就有9萬幾蚊收，點知最後呢位存戶只係收到9000幾蚊，唔保值之餘，計埋通脹仲縮咗水。有網民狠批銀行無賴，仲惡搞農行嘅宣傳口號，變成「大行德廣，伴『賊』成長」。
指息高不符央行規定
話說苦主駱先生89年7月參與農行河北省滄州市青縣支行嘅「生活基金」儲蓄計劃，原本係為子女儲筆錢，畀佢哋廿年後做大學學費。09年9月佢攞住存款單去攞錢，銀行竟然唔認數，話利息太高，唔符合央行規定，而國家規定嘅儲蓄期最長只有5年，冇20年。最搞笑嘅係告到上當地人民法院，法院一方面話合同合法有效，但最後都係叫銀行畀番9000幾蚊了事。內地律師就話，農行應該全數兌現至啱。