旅遊發展局估計今年來港旅客會超過四千二百萬人次，即平均每日有十一萬八千人，如果假設兩個人住一間房，香港需要有五萬九千個酒店/賓館房間，2011年香港有62660間房，2012年估計會有67989間，都夠應付遊客需要嘅，但以2011年酒店房間數目計，2012年入住率高達94%，係一個相當高嘅數字，酒店已應付得相當辛苦，假如啲旅客要留港多一日嘅話，酒店房已爆到瀉，何況好多商務客係要一個人住一間房嘅呢！
結論簡單不過，本港酒店房間供不應求，房租必然上升，會達到趕客地步，唔怪得「香港黃金五十」份報告指出，2011年上半年，香港酒店房租同比增加40%，而新加坡只係增加10%不到，由2001年到2010年，新加坡商業旅客（包括MICE旅客）大增131%，總人次從大落後於香港嘅局面已改為領前香港。
香港近十年在市區興建三星酒店多，五星酒店少，西九兩間新酒店W與RitzCarlton只係代替已經拆咗嘅中環富麗華與麗嘉酒店而已，IFC嘅四季已算係增加新供應。三星酒店以工廈改建，或在工業區興建，主要客戶對象係內地及廉價遊客，對商旅MICE客冇乜吸引力，香港既係世界金融中心，不少豪客來港傾投資、PO生意，佢地最方便就係住在金融區附近，置地公司在置地廣場開設LandmarkMandarinOriental，太古在太古廣場的UpperHouse，係挖空心思之作，可惜都係小型酒店，房間不多。
老友記物流Ｔ想話把荃灣工廈改建為三星酒店，點知在申請過程中，遭受連串挫折（例如居民投訴，未來酒店帶來之噪音，交通擠塞等等），政府機關遲遲未批准，令到物流Ｔ索氣兼喪氣，第一次感受到如非專業發展商，一般商人要搞建設，實在非常累人，真係會搞到心力交瘁。左丁山笑佢：「到你攞齊批准文件之日，改建成本可能已升到瘋癲水平，你要收好貴好貴房租及九成入住率先至掂！」乜唔係啫，興建大學生宿舍嘅建築成本已近三千元一呎，酒店房間比學生宿舍靚好多，建築成本點計呀？
（更正：昨日本欄作者寫A股「力守21000點」，實應為力守2100點。謹此向作者與讀者致歉。）