新年將至，又係單身人士𢭃利是嘅歡樂時間。名醫湯于翰嘅公子湯聖明Sherman，似乎好想令身邊嘅單身朋友更happy，噚日同何鴻燊姻親、大馬主何壽南二女何明懿Ming拉埋天窗，趕及喺龍年派利是。
呢對情人其實舊年先至撻着，不出幾個月就閃婚，好多政商界名流噚晚都有去君悅出席呢次閃婚晚宴，親自向新人送上祝福。現年54歲嘅Sherman早年讀醫，後來棄醫從商成為飲食大亨，旗下餐廳包括中環響噹噹嘅Jimmy'sKitchen同山頂餐廳。佢父親湯于翰係中國第一代治癌名醫，媽媽陳雲裳係名演員，喺30年代更獲得3屆中國電影皇后。49歲嘅何明懿明門當戶對，係富商何壽南二女。何家姻親係賭王，難怪超瓊同超鳳都有去飲。
李嘉欣拖老公出席
據講呢對璧人舊年5月喺李嘉欣囝囝百日宴上公開戀情，李嘉欣同老公許晉亨噚日都着到靚一靚祝賀新人。小小超李澤楷、李國寶夫婦亦有現身。何明懿曾經同利孝和夫人姪仔、希慎後人利子厚拍拖，利孝和都有現身祝福世姪女，六嬸亦單拖赴會。湯于翰係寧波人，據聞同前特首董建華好老友，董太仲係陳雲裳麻雀腳，噚日唔見老董夫婦，反而見到唐媽媽，大家都係上海幫，同聲同氣，實好啱傾。
mailto:[email protected]
