農曆新年將至，零售股又見有資金炒作，不過，生意就算夠旺，盈利隨時會俾租金蠶食，要食正今趟零售熱，買收租股最實際，希慎（014）上周五已率先搶升，要望多幾眼。
希慎旗下希慎廣場將於年中開幕，當中最矚目嘅商戶，莫過於受萬人景仰嘅AppleStore，連同台灣誠品等港人喜愛品牌，肯定令銅鑼灣呢個核心Shopping地帶旺上加旺，作為區內嘅大地主，希慎嘅加租能力只會有增無減。事實上，旗下禮頓中心翻新後已加租三成，對盈利肯定有幫助。
另一方面，美資基金Silchester上月中以平均價24.62元增持希慎股份，涉資1398萬銀。翻查紀錄，該基金去年6月曾以接近摸頂價嘅38.262元減持希慎，今次出手翻兜，值得尊重。希慎上周五收報27.80元，升5.3%，成交急增近倍，買盤動力明顯增強，戰友可候27元水平吸納，目標先睇30元，屆時PB都未夠0.8倍。
唐牛