20歲的你，究竟在做甚麼？為學業操勞？為感情困擾？抑或為前程擔心？眼前的模始祖楊穎（Angelababy）才不過22歲，早在模界奠定基礎，是國際品牌的寵兒，又涉足日本藝能界，近年主力向影圈發展，甚至計劃做歌手。她是少男眼中的Apple，鏡頭前的百變Model，母親疼錫的Angel，更是導演心目中一塊未琢磨的Crystal。Angelababy能與眾不同，全因她抱着感恩態度面對人和事，且凡事從幸福角度去看。 採訪：馬建華
或許Baby注定是模特兒料子，從小在鏡頭前游走，享受被拍感覺；14歲進出影樓，在鎂光燈下展開模特兒生涯；17歲遇上夏永康，有幸在對方鏡頭前裝模作樣，弄出一點成績來。多年來，她出入夏永康的影樓無數次：「大家已經成為好朋友，每次入到影樓，好似有種返屋企感覺。」Chok樣擺甫士非林峯、謝霆鋒專利，Baby自爆愛鑽研甫士：「我好鍾意留意唔同嘅人影嘅相，但唔會刻意模仿，係直覺知道有乜好睇、有乜唔好睇。」Baby憑幾年時間躍升模界寵兒，愛挑戰的她逐漸覺得模特兒工作沒太大新鮮感。
在機緣下，Baby由夏永康的相機鏡頭，一跳跳進其攝影機鏡頭，前年獲邀參演其執導的電影《全城熱戀熱辣辣》，開闢了另一片天。Baby說：「對我係一個好大挑戰，戲中我係冇化妝嘅工廠女工，完全係另一個境界。」及後有幸在電影《建黨偉業》飾演劉德華的太太，她說：「雖然得一場戲，不過都好開心，佢教咗我好多嘢。」
進軍樂壇出專輯
演戲癮起，想停也停不來。從前年9月至今，Baby幾乎沒放過任何假：「跟唔同對手合作都有一種特別火花，就好似同井柏然合作《全》，好記得一幕係我送禮物畀佢，突然擦出真實感覺，令我更入戲。」至於令不少新演員頭痛的喊戲，Baby也有體會：「好記得拍《全》嗰陣，7日裏面要喊3日，每晚收工鼻腔都係眼淚嘅味道，感覺好差。家我已經有秘訣，係萬試萬靈。」
拍戲以外，Baby也想過進軍樂壇。前年她在日本推出單曲，未來也計劃推出專輯。談到音樂，總離不開偶像周杰倫，她第一次踏足紅館舞台，也因偶像當年在香港舉行巡迴演唱會，她說：「記得當日我行緊街，經理人打畀我話聽日去排舞，喺周杰倫演唱會合作演出，當時我呆咗，感覺好似中六合彩一樣。」
雙魚女多愁善感
Baby還有一個身份—商人。近年她先後開設美甲店及餐廳：「工作越來越忙，沒有時間陪媽咪，見到佢有時好悶，機緣下朋友介紹舖位開設美甲店讓媽咪打理，之後又有朋友畀意見，叫我開Cafe，一切都係機緣。」她認為人生匆匆幾十年，不應在埋怨中度過，凡事應從幸福的角度去看：「我好幸運，遇到好多錫自己嘅人，媽咪同經理人又好信任我，讓我去做我想做嘅事。」不過Baby也有情緒低落時，她說：「我係典型雙魚座女仔，多愁善感，有時唔開心都會唔想見人，我會選擇睇戲、睇書同聽歌。」
鳴謝：
Make-upArtist：WillWong（Asst：Shuen）
Hair：CarrCheung（P.O.P.Hairdessing）
Styling：EmilyHo
Dress：Nataliebcoleman(ABoutique)
Bangle：Duras High-heels：Lanvin
